ចិន: ភ្លៀងធ្លាក់យ៉ាងខ្លាំង បានវាយប្រហារក្នុងទីក្រុងហុងកុង នៅថ្ងៃពុធនេះ ដោយបាននាំមកនូវផលរំខាន និងការប៉ះពាល់ធ្ងន់ធ្ងរដល់ផ្នែកជាច្រើននៃទីក្រុង។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២៤ ខែឧសភា ឆ្នាំ២០១៧។

ក្រុមអ្នកអង្កេតការណ៍ទីក្រុង បានចេញសេចក្ដីព្រមានអំពីព្យុះភ្លៀង ជាមួយនឹងកម្រិតកម្ពស់ទឹកភ្លៀង ៧០មីលីម៉ែត្រ ក្នុងមួយម៉ោង ហើយត្រូវបានគេរំពឹងថា នឹងមានភ្លៀងធ្លាក់ចុះនៅទូទាំងទីក្រុងនៅថ្ងៃនេះ។

បើយោងតាមកាសែត South China Morning Post បានឲ្យដឹងថា នៅស្រុក Kwai Tsing និង Sham Shui Po គឺមានទឹកភ្លៀងធ្លាក់ ក្នុងកម្រិតកម្ពស់រហូតដល់ ១០០ មីលីម៉ែត្រឯណ្ណោះ។

អ្នកប្រើប្រាស់ប្រព័ន្ធផ្សព្វផ្សាយសង្គម បានបង្ហោះរូបភាព ដែលបង្ហាញពីទឹកជំនន់នៅផ្នែកជាច្រើននៃទីក្រុងហុងកុង ដែលកំពុងបង្កផលរំខានដល់អ្នកធ្វើដំណើរតាមរថយន្ត និងអ្នកថ្មើរជើង។

លើសពីនេះទៅទៀត ជើងហោះហើរអាកាសចរណ៍ China Eastern Airlines មួយ នៅឯព្រលានយន្តហោះអន្តរជាតិទីក្រុងហុងកុង ត្រូវបានផ្អាកផងដែរ៕