អង់គ្លេស: នាយករដ្ឋមន្រ្តីលោស្រី Theresa May បានបញ្ជាឲ្យស៊ើបអង្កេតជាសាធារណ: បន្ទាប់ករណីឆេះអគារ នៅភាគខាងលិចទីក្រុងឡុងដ៍ ម្ដុំផ្ទះល្វែង ដែលបានសម្លាប់មនុស្សយ៉ាងហោចណាស់ ១៧ នាក់។ នេះបើយោងតាមសារព័ត៌មាន BBC ចេញផ្សាយនៅថ្ងៃ១៦ ខែមិថុនា ឆ្នាំ២០១៧។

ចំនួនអ្នកស្លាប់ ត្រូវបានគេរំពឹងទុកថា អាចនឹងមានការកើនឡើង ខណ:ក្រុមជួយសង្គ្រោះ កំពុងបន្តប្រតិបត្តិការខ្លួន ដើម្បីស្វែងរកអ្នកនៅរស់រានមានជីវិតណាមួយ ពីគំនរអគារ ដែលស្ថិតនៅក្នុងតំបន់ North Kensington។

លោកស្រី May បាននិយាយថា «ប្រជាជននឹងទទួលបានចម្លើយថា មូលហេតុអ្វីខ្លះ ដែលបណ្ដាលឲ្យមានភ្លើងឆេះ រីករាលដាលយ៉ាងឆាប់រហ័សនេះ»។

សូមជំរាបដែរថា ករណីឆេះអគារ Grenfell កម្ពស់ ២៤ជាន់នេះ គឺមានជនរងគ្រោះ ៧៨ នាក់ បានសម្រាកព្យាបាលនៅឯមន្ទីរពេទ្យ ក្នុងនោះ ១៨ នាក់ កំពុងស្ថិតក្នុងស្ថានភាពធ្ងន់ធ្ងរ៕