អាមេរិកៈ ប្រធានាធិបតីអាមេរិកលោក ដូណាល់ ត្រាំ បានច្រានចោលនូវការចោទប្រកាន់ ទៅលើរឿងដែលថា រុស្ស៊ីបានជួយឲ្យលោកឈ្នះតំណែងនៅសេតវិមាននោះ ដោយបានអះអាងកាលពីថ្ងៃពុធថា លោក វ្ល៉ាឌីមៀ ពូទីន ប្រាកដជាពេញចិត្តនឹងការទទួលជ័យជម្នះរបស់លោកស្រី ហ៊ីឡារី គ្លីនតុន ប្រសិនបើលោកស្រីឈ្នះ នៅក្នុងការបោះឆ្នោតប្រធានាធិបតីអាមេរិក កាលពីឆ្នាំមុន ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៣ ខែកក្កដា ឆ្នាំ២០១៧។

ការថ្លែងរបស់លោក ត្រាំ គឺធ្វើទ្បើងដើម្បីការពារកូនប្រុសច្បងរបស់ខ្លួន គឺលោក ដូណាល់ ត្រាំ ជេ អ បន្ទាប់ពីការចេញផ្សាយអ៊ីម៉ែល បង្ហាញពីកូនរបស់លោក ពិតជាទទួលបាននូវការផ្តល់ព័ត៌មានមិនល្អរបស់លោកស្រី គ្លីនតុន ពីសំណាក់ប្រទេសរុស្ស៊ី នៅក្នុងអំឡុងពេលយុទ្ធនាការបោះឆ្នោតឆ្នាំមុន។

ការដោះដូរអ៊ីម៉ែល ត្រូវបានគេមើលឃើញថា ស្ថិតនៅក្នុងត្រីមាសមួយចំនួន ដែលអាចជាភស្តុតាងនាំផ្លូវ នៅក្នុងការស៊ើបអង្កេត ដែលកំពុងបន្តដោយរដ្ឋរាជអាជ្ញាឯករាជ្យមួយ ថាតើយុទ្ធនាការរបស់លោក ត្រាំ ពិតជាបានឃុបឃិតគ្នា ជាមួយទីក្រុងម៉ូស្គូ ដើម្បីអាចឲ្យបេក្ខភាពប្រធានាធិបតី ខាងគណបក្សសាធារណរដ្ឋរូបនេះ ទទួលបានជ័យជម្នះនៅក្នុងការបោះឆ្នោត ពិតមែនឬយ៉ាងណា។

យ៉ាងណាមិញនៅក្នុងបទសម្ភាសន៍មួយ ជាមួយអ្នកតែងព្រះគម្ពីរ យេស៊ូ ដ៏ល្បី លោក Pat Robertson នោះ លោកប្រធានាធិបតី ត្រាំ បានអះអាងថា សមភាគីរុស្ស៊ីរបស់លោក ពិតជាពេញចិត្ត ប្រសិនបើលោកស្រី គ្លីនតុន បេក្ខភាពប្រធានាធិបតី ខាងគណបក្សប្រជាធិបតេយ្យ ឈ្នះការបោះឆ្នោតអាមេរិក នៅក្នុងឆ្នាំ ២០១៦ មែននោះ ។

ក្នុងនោះលោក ត្រាំ ថែមទាំងបានបញ្ជាក់ថា «មានរឿងជាច្រើន ដែលខ្ញុំបានធ្វើផ្ទុយពីអ្វី ដែលលោក ពូទីន ចង់បាន»។ ទោះបីជាលោក បានដើរតួយ៉ាងល្អ ជាមួយមេដឹកនាំរុស្ស៊ីដ៏យូរអង្វែង រួមទាំងការជួបប្រជុំគ្នា នៅទីក្រុងហាំប៊ឺក ប្រទេសអាល្លឺម៉ង់ កាលពីសប្តាហ៍មុនក៏ពិតមែន៕