ប្រធានាធិបតីសហរដ្ឋអាមេរិកលោក ដូណាល់ និងប្រធានាធិបតីកូរ៉េខាងត្បូងលោក មូន ចេអ៊ីន បានឯកភាពគ្នាក្នុងការជំរុញឲ្យមានការដាក់ទណ្ឌកម្មខ្លាំងក្លាជាងមុនទៀត ប្រឆាំងនឹងរដ្ឋាភិបាលកូរ៉េខាងជើង ក្នុងនោះលោក មូន ក៏បានស្នើឲ្យអង្គការសហប្រជាជាតិ ធ្វើការពិចារណាផងដែរ ដើម្បីរារាំងការដឹកជញ្ជូនប្រេងទៅកាន់ប្រទេសកូរ៉េខាងជើងផងដែរ។ នេះបើតាមរយៈសារព័ត៌មាន CNN ចេញផ្សាយនៅថ្ងៃទី០៦ ខែកញ្ញា ឆ្នាំ២០១៧។
មន្ត្រីរដ្ឋាភិបាលសហរដ្ឋអាមេរិក បាននិយាយថា លោក ត្រាំ និងលោក មូន បានឯកភាពគ្នាគ្រប់ចំណុចសំខាន់ៗទាំងអស់នៅក្នុងកិច្ចសន្ទនាតាមទូរស័ព្ទរយៈពេល ៤០ នាទី កាលពីថ្ងៃចន្ទ បន្ទាប់ពីកូរ៉េខាងជើង បានបាញ់សាកល្បងមីស៊ីលឆ្លងទ្វីបបំពាក់ដោយក្បាលគ្រាប់នុយក្លេអ៊ែរ ដែលខ្លួនអះអាងថា ជាគ្រាប់បែកអ៊ីដ្រូសែន ដែលការបាញ់នេះ បានបង្កឲ្យមានការតវ៉ាយ៉ាងខ្លាំងពីសហគមន៍អន្តរជាតិ។
សូមជម្រាបថា មេដឹកនាំទាំងពីរបានសង្កត់ធ្ងន់ថា ការបង្កហេតុរបស់កូរ៉េខាងជើងចុងក្រោយនេះ បានធ្វើឲ្យមានការគំរាមកំហែងយ៉ាងធ្ងន់ធ្ងរ ដល់ពិភពលោកទាំងមូល ហេតុដូចនេះហើយ មេដឹកនាំទាំងពីរបានឯកភាពគ្នា ក្នុងការដាក់សម្ពាធឲ្យមានខ្លាំងក្លាបន្ថែមទៀត ទៅលើរដ្ឋាភិបាលកូរ៉េខាងជើង ដោយប្រើប្រាស់គ្រប់មធ្យោបាយទាំងអស់តាមតែអាចធ្វើទៅបាន៕
មតិយោបល់