មីយ៉ាន់ម៉ា ៖ អង្គការសហប្រជាជាតិប៉ាន់ស្មានថា ជនភៀសខ្លួនជនជាតិភាគតិចរ៉ូហ៊ីងយ៉ា ជាង១សែន២ម៉ឺននាក់បានឆ្លងកាត់ព្រំដែនពីរដ្ឋ Rakhine ភាគខាងជើងប្រទេសមីយ៉ាន់ម៉ាចូលក្នុងប្រទេសបង់ក្លាដែសនៅក្នុងរយៈពេល២សប្តាហ៍ចុងក្រោយនេះ។ នេះបើតាមរយៈសារព័ត៌មាន Bangkok Post ចេញផ្សាយនៅថ្ងៃទី០៦ ខែកញ្ញា ឆ្នាំ២០១៧។
តាមសម្តីពីមន្ត្រីម្នាក់ ប្រចាំតំបន់អាស៊ីជាស្នងការទទួលបន្ទុកជនភៀសខ្លួន របស់អង្គការសហប្រជាជាតិ (UNHCR) បានឲ្យដឹងថា ជនជាតិភាគតិចរ៉ូហ៊ីងយ៉ាបានរស់នៅរាយប៉ាយនៅភូមិនានា ក្នុងជំរំជនភៀសខ្លួន ស្ថិតនៅតំបន់ភាគអាគ្នេយ៍នៃប្រទេសបង់ក្លាដែស។ ពួកគេភាគច្រើន បានធ្វើដំណើរទៅដល់តំបន់នោះ ជាមួយនឹងស្ថានភាពដ៏អាក្រក់បំផុត ដោយពួកគេបានដើរអស់រយៈពេលជាច្រើនថ្ងៃមកហើយ និងមិនបានទទួលទានអាហារចាប់តាំងពីពួកគេបានចាកចេញពីផ្ទះសម្បែងរបស់ខ្លួនមកម្ល៉េះ។
សូមជម្រាបថា៖ ជំរំជនភៀសខ្លួនផ្លូវការ២នៅក្នុងប្រទេសបង់ក្លាដែស មានមនុស្សច្រើនហួសកម្រិត ដោយមានការកើនឡើងជារៀងរាល់ថ្ងៃ ដែលពាក់ព័ន្ធនឹងបញ្ហានេះ មេដឹកនាំជាច្រើន នៅក្នុងសហគមន៍អន្តរជាតិ បានធ្វើការថ្កោលទោសលើអំពើហិង្សានេះ ហើយបានអំពាវនាវឲ្យរដ្ឋបាលលោកស្រី អង់សាន ស៊ូជី ចាត់វិធានការដោះស្រាយបញ្ហានេះ៕
មតិយោបល់