កូរ៉េៈ ដោយផ្អែកតាមថ្ងៃបុណ្យជាតិនាពេលខាងមុខរបស់កូរ៉េខាងជើង រួមបញ្ចូលទាំងប្រភពស៊ើបការណ៍សម្ងាត់ពីកូរ៉េខាងត្បូង និងអាមេរិក បានអះអាងថា ការផ្លាស់ប្ដូរទីតាំងមីស៊ីលជាច្រើនគ្រាប់ ចេញពីមជ្ឈមណ្ឌលស្រាវជ្រាវ និងអភិវឌ្ឍន៍ ក្នុងរដ្ឋធានីរបស់កូរ៉េខាងជើង បានធ្វើឲ្យក្រុមអ្នកជំនាញព្រមានថា តេស្តសាកល្បងអាវុធថ្មីមួយ ទំនងជានឹងកើតឡើងនៅក្នុងប្រទេសមួយនេះ។ នេះបើយោងតាមសារព័ត៌មានរុស្ស៊ី Sputnik ចេញផ្សាយថ្ងៃទី០៣ ខែតុលា ឆ្នាំ២០១៧។

តាមទម្លាប់កូរ៉េខាងជើងតែងមានប្រវត្តិសាស្ត្រ ធ្វើតេស្តអាវុធនៅថ្ងៃបុណ្យឈប់សម្រាកជាតិសំខាន់ៗរបស់ខ្លួន ហើយថ្ងៃបុណ្យមូលនិធិនៃគណបក្សកុម្មុយនីស្ត ជាខួបលើកទី ៧២ នៃការបង្កើតគណបក្សពលករកូរ៉េ ដែលជាបក្សកំពុងកាន់អំណាច (WPK) នឹងចូលមកដល់នាថ្ងៃទី១០ ខែតុលាខាងមុខនេះ។

ប្រភពពីវិមានប្រធានាធិបតីកូរ៉េខាងត្បូង Cheong Wa Dae បានឲ្យដឹងថា កាលបរិច្ឆេទខាងលើ អាចបញ្ជាក់យ៉ាងច្បាស់ថា ឱកាសនៃការបាញ់សាកល្បងអាវុធនុយក្លេអ៊ែរ និងមីស៊ីលផ្លោងពីសំណាក់កូរ៉េខាងជើង នឹងត្រូវធ្វើទ្បើងជាបន្តបន្ទាប់ ដែលវាជាគោលដៅរបស់ទីក្រុងព្យុងយ៉ាង។

គួររំឭកថា មន្ត្រីស៊ើបការណ៍សម្ងាត់កូរ៉េខាងត្បូង និងអាមេរិក កាលពីថ្ងៃសុក្របានរកឃើញថា កូរ៉េខាងជើង បានដឹកជញ្ជូនមីស៊ីលជាច្រើនគ្រាប់ ចេញពីមជ្ឈមណ្ឌលស្រាវជ្រាវ និងអភិវឌ្ឍន៍មីស៊ីល Sanum-dong ស្ថិតនៅប៉ែកខាងជើងនៃក្រុងព្យុងយ៉ាង ចំពេលមានការប៉ាន់ប្រមាណថា របបមួយនេះ កំពុងរៀបចំចាត់វិធានការបង្កហេតុបន្ថែមទៀត នាពេលខាងមុខ៕