កូរ៉េៈ បន្ទាប់ពីសេចក្ដីរាយការណ៍ កាលពីថ្ងៃអាទិត្យថា អាមេរិកកំពុងរៀបចំយន្តហោះទម្លាក់គ្រាប់បែកនុយក្លេអ៊ែរ B-52 ដ៏មានសក្ដានុពលរបស់ខ្លួន ឲ្យស្ថិតក្នុងស្ថានការណ៍ប្រុងជើងការ ២៤ ម៉ោងនោះ កូរ៉េខាងជើងបានវាយប្រហារប្រធានាធិបតីអាមេរិក លោក ដូណាល់ ត្រាំ ជាមួយនឹងការដៀលថា ជាក្មេងពាល និងមនុស្សឆ្កួតលីលាម្នាក់។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២៤ ខែតុលា ឆ្នាំ២០១៧។

នាយសេនាធិការ​កងទ័ព​អាកា លោក David Goldfein បានរាយការណ៍ថា យន្តហោះទម្លាក់គ្រាប់បែក B-52 អាចនឹងចាប់ផ្តើមដំណើរហោះហើររយៈពេលពេញមួយថ្ងៃ ដើម្បីឆ្លើយតបនឹងជម្លោះនុយក្លេអ៊ែរដ៏ផុយស្រួយជាលើកដំបូង មិនធ្លាប់មានចាប់តាំងពីសហភាពសូវៀត បានដួលរលំក្នុងឆ្នាំ ១៩៩១ ដោយលោកបានប្រាប់ក្រុមអ្នកសារព័ត៌មានថា «នេះគឺជាជំហានមួយទៀត ក្នុងការធានាថា អាមេរិកពិតជាបានរៀបចំ និងត្រៀមខ្លួនរួចជាស្រេច»។

ក្នុងនោះលោកបានបន្ថែមថា មហាអំណាចនុយក្លេអ៊ែរ នៅពេលនេះ លែងស្ថិតនៅជារបស់អាមេរិក និងសហភាពសូវៀតដូចមុនទៀតហើយ ដោយសារបច្ចុប្បន្នបណ្ដាលប្រទេសជាច្រើន អាចមានសមត្ថភាពផលិតអាវុធនុយក្លេអ៊ែរ បានយ៉ាងមានសក្ដានុពលបំផុត អាស្រ័យហេតុដូច្នេះហើយ វាពិតជាចាំបាច់ណាស់ សម្រាប់អាមេរិក ដើម្បីធ្វើឲ្យប្រាកដពីបេកសកម្មរបស់ខ្លួននាពេលនេះ៕