អាមេរិក: មន្ទីរបញ្ចកោណ បាននិយាយថា ខ្លួនមានការព្រួយបារម្ភអំពីអាវុធ ដែលអាចនឹងធ្លាក់ចូលទៅក្នុងដៃរបស់ក្រុមភេរវករ បន្ទាប់ពីទីក្រុងម៉ូស្គូ បាននិយាយថា យន្តហោះគ្មានមនុស្សបើក ដែលបានប្រើក្នុងការវាយប្រហារលើមូលដ្ឋានខ្លួន នៅប្រទេសស៊ីរី ជាមួយបច្ចេកវិទ្យាខ្ពស់ចុងក្រោយ អាចផ្គត់ផ្គង់ពីរដ្ឋមួយ។ នេះបើយោងតាមសារព័ត៌មាន RT ចេញផ្សាយនៅថ្ងៃទី៩ ខែមករា ឆ្នាំ២០១៨។

ក្រសួងការពារជាតិរុស្ស៊ី បានរាយការណ៍កាលពីថ្ងៃច័ន្ទថា មូលដ្ឋានទ័ពអាកាស Kheimim និងមូលដ្ឋានដឹកជញ្ជូនដែនសមុទ្រ ក្នុងទីក្រុង Tartus បានស្ថិតនៅក្រោមការវាយប្រហារដ៏ស្មុគស្មាញមួយ កាលពីថ្ងៃសៅរ៍ដោយក្រុមភេរវករ ជាលើកដំបូងជាមួយនឹងបច្ចេកវិទ្យាអាវុធច្នៃប្រឌិតទំនើបបំផុត ក្នុងការកំណត់គោលដៅ។

ការវាយប្រហារនេះ គឺមានជាប់ទាក់ទងនឹងយន្តហោះគ្មានមនុស្សបើកចំនួន ១៣ គ្រឿង ដែលបានវាយលុកដោយទទួលជោគជ័យ ខណ:ការវាយតម្លៃដំបូង បានបង្ហាញថា យន្តហោះគ្មានមនុស្សបើកទាំងនោះ អាចត្រូវទទួលបានពីប្រទេសណាមួយ ដែលមានបច្ចេកវិទ្យាអាវុធទំនើបបំផុត៕