រុស្ស៊ី: គេហទំព័រ 38 North បានរាយការណ៍នៅថ្ងៃអង្គារនេះថា បណ្ដាញផ្កាយរណប បានរកឃើញសញ្ញា នៃសកម្មភាពរ៉េអាក់ទ័ររបស់មជ្ឈមណ្ឌលស្រាវជ្រាវវិទ្យាសាស្ត្រនុយក្លេអ៊ែររបស់កូរ៉េខាងជើង Yongbyon ដែលអាចបង្ហាញថា ក្រុងព្យុងយ៉ាង នៅតែបន្តផលិតសារធាតុ plutonium ដើម្បីកែច្នៃអាវុធនុយក្លេអ៊ែរ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី៦ ខែមីនា ឆ្នាំ២០១៨។

តាមរយ:រូបភាព ដែលគេហទំព័របានថត កាលពីថ្ងៃទី ១៧ និងទី ២៥ ខែកុម្ភ:កន្លងទៅ បានផ្តល់ការវិភាគព័ត៌មានអំពីព្រឹត្តិការណ៍ នៅកូរ៉េខាងជើងថា មានចំហាយភាយចេញពីម៉ាស៊ីនភ្លើង ក៏ដូចជាទឹកកករលាយ នៅជិតម៉ាស៊ីនរ៉េអាក់ទ័រនោះ។

ប្រភពដដែល បានអះអាងទៀតថា ប្រសិនបើម៉ាស៊ីនរ៉េអាក់ទ័រ ពិតជាបានដំណើរការមែននោះ អាចបង្ហាញថា ក្រុងព្យុងយ៉ាង នៅតែបន្តផលិតជាតិ plutonium ក្នុងគោលបំណង ដើម្បីអភិវឌ្ឍកម្មវិធីនុយក្លេអ៊ែររបស់ខ្លួនប្រាកដណាស់៕