កូរ៉េ: ប្រធានាធិបតីចិន លោក ស៊ី ជីនភីង បានផ្តល់ការលើកទឹកចិត្ត ចំពោះកិច្ចផ្តួចផ្តើមរបស់កូរ៉េខាងត្បូង ដើម្បីលើកកម្ពស់ទំនាក់ទំនង ដោយសន្តិវិធីជាមួយកូរ៉េខាងជើង ខណ:ប្រទេសរុស្ស៊ី ក៏បានបង្ហាញនូវការគាំទ្រផងដែរ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៥ ខែមីនា ឆ្នាំ២០១៨។

កាលពីសប្តាហ៍មុន ប្រធានការិយាល័យសន្តិសុខជាតិកូរ៉េខាងត្បូង លោក Chung Eui-yong បានថ្លែងប្រាប់ក្រុមមន្រ្តីនៅទីក្រុងប៉េកាំង និងមូស្គូ អំពីការទទួលភាពជោគជ័យដ៏ធំធេង នៅក្នុងការរៀបចំកិច្ចប្រជុំកំពូលរវាងមេដឹកនាំកូរ៉េខាងជើង កូរ៉េខាងត្បូង និងអាមេរិក។

ពាក់ព័ន្ធនឹងបញ្ហានេះ លោកស៊ី បានប្រលូយនូវពាក្យមួយឃ្លាថា «នៅពេលទឹកកករលាយនានិទាឃរដូវ នោះផ្កាក៏នឹងរីកទ្បើងផងដែរ ដែលន័យនេះ លោកចង់សំដៅទៅស្ថានការណ៍ នៅលើឧបទ្វីបកូរ៉េ រួមទាំងការសម្តែងនូវឆន្ទ:របស់លោក ក្នុងការគាំទ្រដល់ស្ថានភាព នាពេលបច្ចុប្បន្ន រវាងប្រទេសកូរ៉េទាំងពីរ។

ដោយទ្បែកមេដឹកនាំកូរ៉េខាងជើង លោក គីម ជុងអ៊ុន បានប្រាប់គណ:ប្រតិភូកូរ៉េខាងត្បូង ដែលដឹកនាំដោយលោក Chung ថា លោកនឹងបើកចំហចំពោះចរចា ដើម្បីដោះស្រាយបញ្ហានុយក្លេអ៊ែរ ជាមួយអាមេរិក ដោយនឹងអនុញ្ញាតឲ្យមានការជួបប្រជុំកំពូលមួយ រវាងប្រធានាធិបតីអាមេរិកលោក ត្រាំ និងលោក គីម ដែលគេរំពឹងថា នឹងកើតមានឡើងនៅខែឧសភាខាងមុខ៕