Post News Media ព័ត៌មានអន្តរជាតិ រុស្ស៊ី និងអា...

រុស្ស៊ី និងអាមេរិក កំពុងប្រឈមមុខដាក់គ្នាយ៉ាងខ្លាំង នៅ UN ទាក់ទងនឹងបញ្ហានៅស៊ីរី

UN: រដ្ឋាភិបាលអាមេរិក និងរុស្ស៊ី បានប៉ះទង្គិចពាក្យសម្ដីគ្នាយ៉ាងខ្លាំង នៅឯកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ស្តីពីការវាយប្រហារអាវុធគីមី នៅក្នុងប្រទេសស៊ីរី។ នេះបើយោងតាមសារព័ត៌មាន BBC ចេញផ្សាយនៅថ្ងៃទី១០ ខែមេសា ឆ្នាំ២០១៨។

ឯកអគ្គរដ្ឋទូតអាមេរិក លោកស្រី Nikki Haley បានប្រាប់ក្រុមប្រឹក្សា UN ថា មានភ័ស្តុតាងជាក់ស្ដែង ដើម្បីបញ្ជាក់ពីការវាយប្រហារអាវុធគីមី នៅភាគខាងកើតតំបន់ Ghouta ដែលកាន់កាប់ដោយពួកឧទ្ទាម។ លោកស្រី បានចោទប្រកាន់រដ្ឋាភិបាលស៊ីរីថា បានប្រើប្រាស់ឧស្ម័ន Chlorine ប្រឆាំងនឹងប្រជាជនខ្លួនឯង ជាច្រើនលើកច្រើនសារ ក្នុងប៉ុន្មានសប្ដាហ៍ចុងក្រោយនេះ។

ខណ:ដែលការលើកទ្បើងនេះ ត្រូវបានឯកអគ្គរដ្ឋទូតរុស្ស៊ី លោក Vassily Nebenzia បានវាយបកទៅវិញថា អាមេរិក កំពុងធ្វើការឃោសនា ក្នុងគោលបំណងទម្លាក់កំហុសទៅលើរដ្ឋាភិបាលស៊ីរី ដោយមិនសមហេតុផលទាល់តែសោះ និងបានស្នើឲ្យកែប្រែពាក្យសម្ដីរបស់ខ្លួនវិញ ខណ:សង្កត់ធ្ងន់ថា បញ្ហានេះ គួរតែត្រូវបានស៊ើបអង្កេតដោយវិជ្ជាជីវ: ប៉ុន្តែអាមេរិក បានធ្វើការច្រានចោលផងដែរ៕