ហ្គាតេម៉ាឡាៈ ក្រុមមន្ត្រីបាននិយាយថា មនុស្ស ២៥ នាក់ បានស្លាប់បាត់បង់ជីវិត និងរាប់រយនាក់ទៀត បានរងរបួស បន្ទាប់ពីភ្នំភ្លើង Fuego នៅក្នុងប្រទេស​ហ្គាតេម៉ាឡា បានផ្ទុះឡើងជាថ្មី។ នេះបើយោងតាមសារព័ត៌មាន BBC ចេញផ្សាយនៅថ្ងៃទី៤ ខែមិថុនា ឆ្នាំ២០១៨។

ភ្នំភ្លើងនេះ ស្ថិតនៅចម្ងាយប្រហែលជា ៤០ គីឡូម៉ែត្រពីភាគនិរតីនៃរដ្ឋធានីហ្គាតេម៉ាឡា ដោយការផ្ទុះរបស់វានេះ បានជះឥទ្ធិពលយ៉ាងខ្លាំង ជាមួយនឹងថ្ម និងផ្សែងខ្មៅ ក៏ដូចជាផេះទៅលើបរិយាកាស។

ទីភ្នាក់ងារគ្រប់គ្រងគ្រោះមហន្តរាយជាតិ (Conred) បានឲ្យដឹងថា ទន្លេនៃកម្អែភ្នំភ្លើងមួយនេះ បានវាយប្រហារនៅភូមិ El Rodeo ដោយបំផ្លាញផ្ទះ និងដុតផ្ទះជាច្រើនខ្នង។

សូមជំរាបថា អាជ្ញាធរ​ហ្គាតេម៉ាឡា បានជម្លៀស​ប្រជាជនរាប់ពាន់​នាក់ ទៅកាន់កន្លែង​សុវត្ថិភាព ចំណែកឯអាកាសយានដ្ឋាន La Aurora ស្ថិតនៅក្នុងរដ្ឋធានី​ ត្រូវបង្ខំចិត្តបិទទ្វារជា​បណ្ដោះអាសន្នផងដែរ៕