អាហ្វហ្គានីស្ថានៈ អ្នកនាំពាក្យរបស់កងទ័ព ក្នុងតំបន់ភាគខាងជើង លោក Nasratullah Jamshidi នៅថ្ងៃព្រហស្បតិ៍នេះ បានឲ្យដឹងថា សមាជិកក្រុមសកម្មប្រយុទ្ធចំនួន ៥០នាក់ បានបោះបង់ចោលការប្រយុទ្ធ និងប្រគល់អាវុធរបស់ខ្លួនទៅឲ្យរដ្ឋាភិបាលក្នុងស្រុក Dawlatabad ភាគខាងជើងខេត្ត Faryab កាលពីថ្ងៃពុធ។ នេះបើយតាមរយៈ សារព័ត៌មានចិនស៊ិនហួរ ចេញផ្សាយនៅថ្ងៃទី២៣ ខែមិថុនា ឆ្នាំ២១០៦។

បើតាមលោក Jamshidi បានប្រាប់ភ្នាក់ស៊ីនហួរថា “ពួកឧទ្ទាមតាលីបង់មានចំនួនសរុប ៥០នាក់ បានប្រគល់អាវុធរបស់ខ្លួនទៅឲ្យកងកម្លាំងសន្តិសុខនៅក្នុងស្រុក Dawlatabad កាលពីល្ងាចថ្ងៃពុធ”។

អតីតក្រុមឧទ្ទាមទាំងអស់ បានប្តេជ្ញាថា ពួកគេនឹងចូលរួមក្នុងសហគមន៍របស់ខ្លួន ដើម្បីធ្វើការសម្រាប់សន្តិភាព និងស្ថិរភាពនៅក្នុងប្រទេស នេះបើតាមមន្ត្រីបានឲ្យដឹងបន្ថែម។

នេះជាលើកទីពីរហើយ ដែលពួកសកម្មប្រយុទ្ធប្រឆាំងរដ្ឋាភិបាល បានសុំចុះចាញ់ររដ្ឋាភិបាល នៅតំបន់ភាគខាងជើង ក្នុងរយៈពេលប៉ុន្មានថ្ងៃនេះ។

គួរបញ្ជាក់ផងដែរថា បើតាមមន្រ្តីមូលដ្ឋាន កាលពីថ្ងៃអង្គារ បានឲ្យដឹងថា ពួកសកម្មប្រយុទ្ធតាលីបង់ចំនួនជាង ១០០នាក់ បានបោះបង់ចោលការប្រយុទ្ធនៅខេត្ត Jauzjan ព្រមទាំងបានប្រគល់អាវុធរបស់ខ្លួន ទៅឲ្យកងកម្លាំងសន្តិសុខផងដែរ៕