ថៃ: ការបាត់ខ្លួនដ៏អាថ៌កំបាំងនៃមនុស្សទាំង ១៣នាក់ បន្ទាប់ពួកគេបាននាំគ្នាចូលទៅក្នុងល្អាងភ្នំមួយ នៅពុំទាន់មានតំរុយនៅទ្បើយទេ ខណ:ប្រតិបត្តិការជួយសង្គ្រោះជាតិ និងអន្តរជាតិ នៅតែបន្តរុករកយ៉ាងសស្រាក់សស្រាំ។ នេះបើតាមសារព័ត៌មានថៃ Bangkok Post ចេញផ្សាយនៅថ្ងៃទី២៩ ខែមិថុនា ឆ្នាំ២០១៨។
អាជ្ញាធរថៃ នៅថ្ងៃសុក្រនេះ បានឲ្យដឹងថា ឧបករណ៍ខួងអណ្តូង ត្រូវបានគេដាក់ឲ្យដំណើរ ដើម្បីប្រតិបត្តិការតាមរុករកក្រុមកីឡាករបាល់ទាត់ចំនួន ១២នាក់ រួមទាំងជំនួយការគ្រូបង្វឹកម្នាក់ ដែលបានបាត់ដំណឹងយ៉ាងអាថ៌កំបាំង នៅក្នុងល្អាងភ្នំ Tham Luan ដែលត្រូវទឹកជន់លិច ស្ថិតនៅភាគខាងជើងខេត្តឈៀងរ៉ៃ ចាប់តាំងតែពីថ្ងៃសៅរ៍សប្តាហ៍មុន។
ប្រភពដដែលបានបញ្ជាក់ថា ម៉ាស៊ីនចល័តសម្រាប់ខួងធំៗចំនួន ៥គ្រឿង ត្រូវបានដាក់ដំណើរការនៅកន្លែងកើតហេតុ ដោយអាជ្ញាធរថៃ ជាអ្នកជ្រើសរើសកន្លែងដែលប្រសើរបំផុត ក្នុងការខួងបើកផ្លូវទឹកឲ្យហូរចេញពីល្អាងភ្នំបានរហ័សជាងមុន ប៉ុន្តែវាមិនមែនជារឿងងាយស្រួលប៉ុន្មានទ្បើយ ខណ:ដែលទឹកជនន់នៅមាត់ល្អាង បានថយចុះក្នុងកម្រិតតិចតួចប៉ុណ្ណោះ៕
មតិយោបល់