អាមេរិក: ប្រធានាធិបតីអាមេរិក លោក ដូណាល់ ត្រាំ បានថ្លែងកាលពីថ្ងៃសៅរ៍ថា «រឿងតែមួយគត់ប៉ុណ្ណោះ ដែលអាមេរិកនឹងត្រូវធ្វើ ទាក់ទងទៅនឹងការសាកល្បងមីស៊ីលផ្លោងអន្តរទ្វីប និងការអភិវឌ្ឍន៍អាវុធនុយក្លេអ៊ែររបស់កូរ៉េខាងជើង»។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី ០៨ ខែតុលា ឆ្នាំ២១០១៧។

ដំបូងទ្បើងរដ្ឋបាលប្រធានាធិបតីអាមេរិក ចង់ធ្វើកិច្ចចរចាជាមួយកូរ៉េខាងជើង ប៉ុន្តែដោយមើលឃើញពុំទទួលបានផ្លែផ្កា លោក ត្រាំ ក៏បានធ្វើការបដិសេធទៅវិញផងដែរ ខណ:លោកបានលើកទ្បើងថា កិច្ចចរចាជាមួយក្រុងព្យុងយ៉ាង គឺជាការខ្ជះខ្ជាយឥតប្រយោជន៍ ហើយរឿងតែមួយគត់ប៉ុណ្ណោះ ដែលរដ្ឋបាលលោក ត្រូវចាត់ការនិងរបបកុម្មុនិស្តមួយនេះ។

សូមជំរាបថា ភាពតានតឹងនៅលើឧបទ្វីបកូរ៉េ កាន់តែខ្លាំងទ្បើង បន្ទាប់ពីមានសង្គ្រាមវោហាសាស្ត្រដ៏ក្តៅគគុក ក្នុងរយ:ប៉ុន្មានខែថ្មីៗនេះ រវាងមហាអំណាច និងមេដឹកនាំកូរ៉េខាងជើង ជាមួយការគំរាមគំហែង និងឌឺដងឲ្យគ្នាទៅវិញទៅមក។

កាលពីដើមសប្តាហ៍នេះ នៅក្នុងកិច្ចប្រជុំមួយ ជាមួយមេដឹកនាំយោធាកំពូលអាមេរិក លោក ត្រាំ បានថ្លែងនៅចំពោះមុខអ្នកយកព័ត៌មាន អំពីបញ្ហាកូរ៉េខាងជើងថា «ស្ងប់ស្ងាត់មុនពេលមានព្យុះ»។

ពាក់ព័ន្ធនឹងសម្ដីខាងលើនេះ បានធ្វើឲ្យក្រុមអ្នកយកព័ត៌មានស្នើឲ្យលោកធ្វើការបញ្ជាក់ផងដែរ ប៉ុន្តែលោក ត្រាំ មិនបានផ្តល់ការបំភ្លឺអ្វីបន្ថែមនោះទេ ដោយលោកគ្រាន់តែបាននិយាយថា «អ្នកនឹងបានដឹងអំពីវា»៕