កូរ៉េ: រដ្ឋាភិបាលក្រុងសេអ៊ូល បាននិយាយនៅថ្ងៃសុក្រនេះថា ខ្លួនបានដាក់ពង្រាយយន្ដហោះយោធាជាច្រើនគ្រឿង ដើម្បីស្ទាក់ចាប់យន្តហោះចម្បាំងចិន ដែលបានហោះចូលមកក្នុងដែនអាកាសរបស់កូរ៉េខាងត្បូង។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៧ ខែកក្កដា ឆ្នាំ២០១៨។

មេបញ្ជាការរួមគ្នារបស់កូរ៉េខាងត្បូង (JCS) បាននិយាយនៅក្នុងសេចក្តីថ្លែងការណ៍មួយថា យន្តហោះចម្បាំងចិន បានហោះរយ:ពេលជាង ៤ ម៉ោង ចូលក្នុងតំបន់ការពារដែនអាកាសរបស់កូរ៉េ (ADIZ) បន្ទាប់ពីបានហោះនៅក្បែរទីតាំងថ្មលិចទឹក ក្នុងតំបន់ដែលគ្រប់គ្រង ដោយក្រុងសេអ៊ូល ប៉ុន្តែត្រូវបានក្រុងប៉េកាំងអះអាងថាជារបស់ខ្លួន។

យ៉ាងណាមិញ JCS បានបញ្ជាក់ថា កងកម្លាំងអាកាសកូរ៉េខាងត្បូង បានដាក់ពង្រាយយន្ដហោះចម្បាំងច្រើនគ្រឿង ដើម្បីតាមដាន និងព្រមានដល់យន្តហោះចិន ឲ្យចាកចេញពីដែនអាកាសរបស់ពួកគេ។

ដោយពាក់ព័ន្ធនឹងបញ្ហានេះ គឺមិនមានសេចក្តីអធិប្បាយភ្លាមៗ ពីសំណាស់ភាគីប្រទេសចិននៅទ្បើយទេ។

សូមជំរាបថា តំបន់ ADIZs មិនត្រូវបានចុះកិច្ចព្រមព្រៀង ដោយស្របច្បាប់ក្រោមសន្ធិសញ្ញាអន្តរជាតិទេ ប៉ុន្តែក្រុងសេអ៊ូល បានពង្រីកដែនដីគ្រប់គ្រងរបស់ខ្លួន កាលពីឆ្នាំ ២០១៣ ខណ:ផ្នែកខ្លះៗ ជាតំបន់ត្រួតស៊ីគ្នា ដែលត្រូវបានប្រកាសដោយប្រទេសចិន៕