ឥណ្ឌូនេស៊ីៈ អ្នកទេសចរជាង ១,០០០ នាក់ ត្រូវបានអាជ្ញាធរជម្លៀសខ្លួន ចេញពីប្រជុំកោះ Gili នៅឥណ្ឌូណេស៊ី នាថ្ងៃច័ន្ទនេះ បន្ទាប់ពីគ្រោះរញ្ជួយដីដ៏ខ្លាំងមួយ បានវាយប្រហារនៅក្បែរកោះជិតខាង Lombok ដែលបានសម្លាប់មនុស្ស ៩១ នាក់ និងមនុស្សរាប់រយនាក់រងរបួស។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី៥ ខែសីហា ឆ្នាំ២០១៨។

Gili គឺជា​ប្រជុំ​​​កូន​កោះ​ផ្កាថ្ម​តូច​ៗ​ចំនួន​៣ ដែលមានចម្ងាយប្រមាណពីរបីគីឡូម៉ែត្រ ពីឆ្នេរសមុទ្រភាគខាងជើង នៃកោះធំ Lombok ដែលមានប្រជាប្រិយភាពបំផុត ទៅលើវិស័យទេសចរណ៍។

រូបភាពដែលត្រូវបានបង្ហោះតាមអនឡាញ ដោយមន្រ្តីជួយសង្គ្រោះ បានបង្ហាញឲ្យឃើញថា ភ្ញៀវទេសចររាប់រយនាក់ និងអ្នកស្រុកជាច្រើននាក់ បានភ័យស្លន់ស្លោយ៉ាងខ្លាំង នៅលើឆ្នេរ អំទ្បុងពេលដែលពួកគេរង់ចាំការដឹកជញ្ជូនទៅកាន់ទីសុវត្ថិភាព។

លោក Muhammad Faozal ប្រធានភ្នាក់ងារទេសចរណ៍នៅខេត្ត West Nusa Tenggara បាននិយាយថា មានអ្នកទេសចរបរទេសប្រមាណជា ១,២០០នាក់ នៅលើកោះ Gilis ។

ដោយលោកបានប្រាភ្នាក់ងារ AFP ថា៖ «យើងមិនអាចជម្លៀសពួកគេទាំងអស់ នៅពេលតែមួយបានទេ ពីព្រោះការដាក់មនុស្ស ឲ្យនៅលើទូករបស់យើង គឺមានការកំណត់ ខណៈពួកគេ ចង់ចាកចេញពីកោះភ្លាមៗនោះ»៕