Post News Media ព័ត៌មានអន្តរជាតិ តុលាការកំពូលវ...

តុលាការកំពូលវ៉េណេស៊ុយអេឡា រារាំងមេដឹកនាំគណបក្សប្រឆាំង ចាកចេញពីប្រទេស

វ៉េណេស៊ុយអេឡា: តុលាការកំពូលរបស់ប្រទេសវ៉េណេស៊ុយអេឡា បានហាមឃាត់មេដឹកនាំបក្សប្រឆាំង លោក Juan Guaidó មិនឱ្យចាកចេញពីប្រទេស និងបានបង្កកគណនីធនាគាររបស់លោកផងដែរ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី៣០ ខែមករា ឆ្នាំ២០១៩។

ការផ្លាស់ប្តូរនេះ បានកើតឡើងចំពេលមានការតស៊ូដណ្តើមអំណាច បន្ទាប់ពីលោក Guaido បានប្រកាសខ្លួនឯងជាប្រធានាធិបតីបណ្តោះអាសន្ន កាលពីសប្តាហ៍មុន។

លោក Guaido ត្រូវបានគាំទ្រដោយអាមេរិក និងបណ្តាប្រទេសដទៃទៀត។ ខណ:ដែលតំណែងប្រធានាធិបតីវ៉េណេស៊ុយទ្បា បច្ចុប្បន្នលោក Nicolás Maduro មានការគាំទ្រពីសម្ព័ន្ធមិត្តធំៗ ជាក់ស្ដែងក៏មានទាំងរុស្ស៊ីផងដែរ។

ទន្ទឹមនឹងនេះដែរ ក្រុមនៃបណ្តាប្រទេសនៅអាមេរិកខាងជើង និងខាងត្បូង ក៏បានធ្វើជំទាស់ផងដែរ ទាក់ទងនឹងការចូលរួមរបស់យោធាខាងក្រៅ ដើម្បីដោះស្រាយវិបត្តិក្នុងប្រទេសមួយនេះ។ ខណ:មន្ត្រីអាមេរិក បាននិយាយថា ជម្រើសទាំងអស់ ដើម្បីដោះស្រាយវិបត្តិ គឺស្ថិតនៅលើតុចរចា។

សូមជំរាបថា វេណេស៊ុយអេឡា កំពុងប្រឈមនឹងបញ្ហាសេដ្ឋកិច្ចយ៉ាងធ្ងន់ធ្ងរ ក៏ដូចជាការកើនឡើងនូវអំពើហិង្សក្នុងប្រទេស នៅប៉ុន្មានសប្តាហ៍ថ្មីៗនេះផងដែរ៕

Loading...