ថៃៈ លទ្ធផលឆ្នោតរាប់សន្លឹកឆ្នោតប្រមាណ៩០ភាគរយ ត្រូវបានបង្ហាញថា គណបក្សភឿថៃរបស់លោក ថាក់ស៊ីន បាននាំមុខគេនៅលេខរៀងទី១ ស្របពេលគណបក្ស Palang Pracharath ដែលគាំទ្ររបបយោធារបស់ប្រាយុទ្ធ ស្ថិតនៅលេខរៀងទី២។ នេះបើយោងតាមសារព័ត៌មាន Bangkok Post ចេញផ្សាយនៅថ្ងៃទី២៤ ខែមិនា ឆ្នាំ២០១៩។

ប្រទេសថៃ បាន​ដំណើរការបោះឆ្នោតសកល កាលពីថ្ងៃអាទិត្យជាលើកដំបូងបំផុត ចាប់តាំងពីរដ្ឋប្រហារយោធា ទម្លាក់នាយរដ្ឋមន្ត្រីលោកស្រី យីងឡាក់ ស៊ីណាវ៉ាត់ កាលពីខែឧសភា ឆ្នាំ២០១៤កន្លងមក។ ដោយតួលេខនៃចំនួនប្រជាជន​ទៅបោះឆ្នោត ត្រូវបានគេប៉ាន់ប្រមាណថា មានរហូតដល់៨០ភាគរយ ក្នុងចំណោមប្រជាជនថៃ ដែលមានសិទ្ធិបោះឆ្នោត៥១.២ លាននាក់។

សូមជំរាបថា លទ្ធផលផ្លូវការ នឹងត្រូវប្រកាសនៅថ្ងៃទី០៩ ខែឧសភាខាងមុខ ហើយដើម្បី​អាច​បង្កើតរដ្ឋាភិបាល​មួយ​បាន បក្សនយោបាយ​ឈ្នះឆ្នោត គឺ​ត្រូវមាន​អសនៈចាប់ពី៣៧៦ឡើងទៅ ក្នុងចំណោម​អសនៈសរុប ៥០០ឯណ្ណោះ៕