ផ្ទះ ព័ត៌មានអន្តរជាតិ កាន់តែទ្បើងកម...

កាន់តែទ្បើងកម្ដៅទៀតហើយ! កូរ៉េខាងជើង បាញ់មីស៊ីលផ្លោងជាច្រើនគ្រាប់ ខណ:អាមេរិក រឹបអូសនាវា

0

កូរ៉េ: ក្រុងព្យុងយ៉ាង បានបាញ់គ្រាប់មីស៊ីលរយ:ចម្ងាយខ្លីចំនួនពីរគ្រាប់ កាលពីថ្ងៃព្រហស្បតិ៍ ដែលជាការសាកល្បងលើកទី ២ របស់ខ្លួនក្នុងរយ:ពេលមិនដល់មួយសប្តាហ៍ផង បន្ទាប់ពីអាមេរិក បាននិយាយថា ខ្លួនបានរឹបអូសនាវាផ្ទុកទំនិញរបស់កូរ៉េខាងជើង ខណ:ភាពតានតឹង បានកើនឡើងជាថ្មីម្តងទៀត រវាងប្រទេសទាំងពីរ។ នេះបើយោងតាមសារព័ត៌មាន Channel News Asias ចេញផ្សាយនៅថ្ងៃទី១០ ខែឧសភា ឆ្នាំ២០១៩ ។

ប្រធានាធិបតីអាមេរិកលោក ដូណាល់ ត្រាំ បាននិយាយថា គ្មាននរណាម្នាក់សប្បាយចិត្ត នៅការបាញ់បង្ហោះនោះទេ ប៉ុន្តែរដ្ឋាភិបាលខ្លួន នៅតែមានការបើកទ្វារចំហ សម្រាប់កិច្ចចរចាបន្ថែមទៀត ជាមួយកូរ៉េខាងជើង។

ពាក់ព័ន្ធនឹងករណីនេះ កូរ៉េខាងត្បូង បាននិយាយថា ការធ្វើតេស្តនេះ ធ្វើឲ្យមានការព្រួយបារម្ភខ្លាំង ហើយវាក៏មិនអាចជួយអ្វីបានទ្បើយ ទំនងជាក្រុងព្រុងយ៉ាង ចង់តវ៉ាប្រឆាំងនឹងលោក ត្រាំ ដែលបដិសេធការបន្ធូរបន្ថយទណ្ឌកម្មសេដ្ឋកិច្ច ទៅលើប្រទេសពួកគេ បន្ទាប់ពីការបរាជ័យ ក្នុងកិច្ចប្រជុំកំពូលមួយ នៅឯទីក្រុងហាណូយ កាលពីខែកុម្ភ:កន្លងទៅ។

សូមជំរាបថា អាមេរិក មិនបានផ្តល់សញ្ញាណាមួយនៃឆន្ទ: ក្នុងការផ្លាស់ប្តូរទណ្ឌកម្មនោះទេ ហើយកាលពីថ្ងៃព្រហស្បតិ៍ ក្រសួងយុត្តិធម៌អាមេរិក បានប្រកាសពីការរឹបអូសនាវាដឹកទំនិញ របស់កូរ៉េខាងជើង ដែលក្រុងវ៉ាស៊ីនតោន បាននិយាយថា ការរឹបអូសនេះ ពាក់ព័ន្ធនឹងការដឹកជញ្ជូនធ្យូងថ្ម ខុសច្បាប់៕

Leave a Reply

This site uses Akismet to reduce spam. Learn how your comment data is processed.