ចិន: គណ:កម្មាធិការសុខភាពជាតិ បានឱ្យដឹងថា ចំនួនអ្នកស្លាប់ដោយសារការឆ្លងវីរុសថ្មីកូរ៉ូណា ឬ COVID-19 នៅប្រទេសចិន បានកើនឡើងដល់ជាង ២០០០ នាក់ នៅថ្ងៃពុធនេះ បន្ទាប់ពីមានករណីថ្មី នៃមនុស្សស្លាប់បន្ថែមទៀតចំនួន ១៣៦ នាក់។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៩ ខែកុម្ភ: ឆ្នាំ២០២០។

ដោយទ្បែកករណីអ្នកឆ្លងសរុប ត្រូវបានបញ្ជាក់នៅក្នុងប្រទេសចិន នៅពេលនេះ គឺមានចំនួន ៧៤,១៨៥ នាក់។

ប្រភពដដែល បានឲ្យដឹងទៀតថា ចំនួនអ្នកស្លាប់ បានកើនឡើងដល់ ២,០០៤ នាក់ ដែលភាគច្រើន មកពីភាគកណ្តាលខេត្តហ៊ូប៉ី ជាកន្លែងដែលវីរុសនេះ បានផ្ទុះទ្បើងជាលើកដំបូង នៅខែធ្នូមុនពេលឆ្លងរាលដាលដល់ទូទាំងប្រទេស។

តាមរយ:ការធ្វើបច្ចុប្បន្នភាពប្រចាំថ្ងៃ របស់គណ:កម្មការសុខភាពជាតិ បានរាយការណ៍ថា មានករណីអ្នកឆ្លងថ្មីចំនួន ១,៧៤៩ នាក់ នៅទូទាំងប្រទេស ដែលជាតួលេខទាបបំផុតមួយ សម្រាប់ខែនេះ៕