ព័ត៌មានអន្តរជាតិ

អាមេរិក ផ្គត់ផ្គង់គ្រាប់រំសេវដល់សកម្មភាពកងកម្លាំងតួកគី នៅស៊ីរី ស្ដែងឲ្យឃើញពីចេតនាគាំទ្រ

អាមេរិក: កាលពីថ្ងៃច័ន្ទរដ្ឋមន្រ្តីក្រសួងការពារជាតិ លោក Mark Esper បាននិយាយថា អាមេរិក នឹងមិនផ្តល់ការគាំទ្រតាមអាកាសដល់ប្រទេសតួកគី សម្រាប់ការវាយដណ្ដើម តំបន់សេសសល់ក្នុងខេត្តរបស់ប្រទេសស៊ីរីនោះទេ។ នេះបើយោងតាមសារណ័ត៌មាន Sputnik ចេញផ្សាយនៅថ្ងៃទី៤ ខែមីនា ឆ្នាំ២០២០។

ប៉ុន្តែអ្នកតំណាងពិសេសរបស់អាមេរិក ប្រចាំនៅស៊ីរី លោក James Jeffrey បាននិយាយថា អាមេរិក មានបំណងគាំទ្រ ប្រតិបត្តិការរបស់យោធាតួកគី នៅខេត្ត Idlib តាមរយ:ការផ្គត់ផ្គង់គ្រាប់រំសេវ និងជំនួយមនុស្សធម៌។

ការថ្លែងរបស់លោក ត្រូវបានដកស្រង់សម្តី ដោយអ្នកយកព័ត៌មាន Reuters នៅទីក្រុង Hatay កាលពីថ្ងៃអង្គារថា «យើងមានឆន្ទ: សម្រាប់ការផ្តល់ឲ្យពួកគេ ជាក់ស្ដែងដូចជាឧទាហរណ៍ស្រាប់ ដែលលោកប្រធានាធិបតី ត្រាំ ធ្លាប់បានលើកឡើង ទាក់ទងនឹងគ្រាប់រំសេវ»។

ក្នុងនោះលោក Jeffrey បានបន្ថែមថា «តួកគី គឺជាសម្ព័ន្ធមិត្តរបស់ណាតូ ហើយយើង មានកម្មវិធីលក់អាវុធយោធាបរទេសដ៏ធំមួយ ដែលភាគច្រើន គឺជាឧបករណ៍យោធារបស់អាមេរិក។ យើងនឹងធ្វើឱ្យប្រាកដថា ឧបករណ៍ទាំងនោះ បានត្រៀមរួចរាល់ និងអាចប្រើការបាន» ៕

មតិយោបល់