អ៊ីតាលី: នាយករដ្ឋមន្រ្តីអ៊ីតាលីលោក Giuseppe Conte កាលពីថ្ងៃច័ន្ទ បានពង្រីកវិធានការណ៍បន្ថែមទៀត ដើម្បីទប់ស្កាត់ការឆ្លងនៃវីរុសកូរ៉ូណា នៅពាសពេញប្រទេស។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១០ ខែមីនា ឆ្នាំ២០២០។

ដោយលោក បានប្រាប់ប្រជាជនឲ្យស្នាក់នៅក្នុងផ្ទះ និងហាមឃាត់ការប្រមូលផ្តុំ ឬជួបជុំគ្នាតាមទីសាធារណ: បន្ទាប់ពីពលរដ្ឋ មិនបានទទួលយកការព្រមានគ្រាមុនៗ ទុកនៅក្នុងចិត្ត ចំពេលមានការឆ្លងរាលដាលខ្លាំងទ្បើង នៃជំងឺឆ្លងនេះ។

ជាក់ស្ដែងការរឹតត្បិតទូទាំងប្រទេស ត្រូវបានចូលជាធរមានចាប់ពីថ្ងៃអង្គារទី១០មីនា រហូតដល់ថ្ងៃទី៣ មេសា ព្រមទាំងការបន្លាយពេលបិទទ្វារសាលារៀន សាកលវិទ្យាល័យ និងការបិទហាងលក់អាហារ និងហាងកាហ្វេនៅពេលព្រលប់។

សូមជំរាបថា អ៊ីតាលីបានចុះបញ្ជីករណីឆ្លងចំនួន ១,៨០៧ បន្ថែមទៀត គិតមកត្រឹមល្ងាចថ្ងៃច័ន្ទ ដោយសរុបករណីអ្នកឆ្លងពេលនេះ មានចំនួន ៩,១៧២ នាក់ហើយ។ ខណ:តួលេខអ្នកស្លាប់ បានកើនឡើងដល់ ៤៦៣ នាក់៕