តួកគីៈ សេចក្ដីថ្លែងការណ៍មួយរបស់កងទ័ពតួកគី នៅថ្ងៃព្រហស្បតិ៍នេះ បានឲ្យដឹងថា យន្តហោះចម្បាំងតួកគី បានបើកប្រតិបត្តិការវាយប្រហារដែនអាកាស ២៦ លើក ទៅលើទីតាំងពួកសកម្មប្រយុទ្ធឃើដ YPG ចំនួន ១៨ កន្លែង នៅភាគខាងជើងប្រទេសស៊ីរី ដែលបានសម្លាប់សកម្មប្រយុទ្ធស៊ីរីជិត ២០០ នាក់។ នេះបើយោងតាមរយៈ សារព័ត៌មានចិនសិង្ហបុរី ចេញផ្សាយនៅថ្ងៃទី២០ ខែតុលា ឆ្នាំ២០១៦។

កងទ័ពតួកគី បាននិយាយថា ខ្លួនបានវាយប្រហារនៅតំបន់ថ្មីៗ ដែលកាន់កាប់ដោយកងកម្លាំងសកម្មប្រយុទ្ធ YPG និងបានបំផ្លាញអគារចំនួន ៩ រួមទាំងរថពាសដែកមួយ និងរថយន្តបួនគ្រឿងផ្សេងទៀត របស់កងជីវពលឃើដ YPG ។

គួបញ្ជាក់ដែរថា ប្រទេសតួកគីដែលជាអ្នកគាំទ្រសំខាន់នៃការបះបោរប្រឆាំង នឹងប្រធានាធិបតីលោក Bashar al-Assad បានចូលរួមក្នុងជម្លោះប្រទេសស៊ីរី តាំងពីខែសីហា ដោយបានប្រើអាវុធ និងធ្វើការវាយប្រហារដែនអាកាសរបស់ខ្លួន ដើម្បីជួយដល់ក្រុមឧទ្ទាមកងទ័ពស៊ីរី នៅក្បែរព្រំដែនទឹកដីរដ្ឋអ៊ីស្លាម៕