សេអ៊ូល: គណបក្សយុត្តិធម៌ ដែលជាបក្សប្រឆាំងនៅក្នុងប្រទេស កូរ៉េខាងត្បូង នៅថ្ងៃច័ន្ទនេះ បានប្រកាសដាក់ការចោទប្រកាន់ទៅលើលោកស្រី ផាក គឿនហេ ជាបញ្ហាអតិភាពកំពូលរបស់ខ្លួន និងកំពុងស្វែងរកកិច្ចសហប្រតិបត្តិការជាមួយគណបក្សផ្សេងទៀត ដើម្បីទំលាក់ប្រមុខរដ្ឋដែលកំពុងធ្លាក់ចូលរឿងអាស្រូវពុករលួយនេះ។

យោងតាមសារព័ត៌មាន The KoreaTimes ចេញផ្សាយនៅថ្ងៃទី២១ ខែវិច្ឆិកា ឆ្នាំ២០១៦ បានឲ្យដឹងថា គណបក្សធំជាងគេទី៣នៅក្នុងរដ្ឋសភា បានជំរុញឲ្យព្រះរាជអាជ្ញាដាក់បម្រាមចេញក្រៅប្រទេស ទៅលើលោកស្រីប្រធានាធិបតី ផាក គឿនហេ និងចាត់វិធានការតាមផ្លូវច្បាប់ដើម្បីសាកសួរដោយផ្ទាល់ទៅលើប្រធានាធិបតី។

សូមជម្រាបផងដែរថា ការជំរុញឲ្យព្រះរាជអាជ្ញាដាក់បម្រាមហាមប្រធានាធិបតីចេញក្រៅប្រទេសនេះ បានធ្វើឡើងបន្ទាប់ពីព្រះរាជអាជ្ញាបានកំណត់ថា លោកស្រីប្រធានាធិបតីជាអ្នកផ្សំគំនិត និងជាប់សង្ស័យពាក់ព័ន្ធបទឧក្រិដ្ឋកម្ម ខណ:រដ្ឋអាជ្ញាបានចោទប្រកាន់ជាផ្លូវការទៅលើមិត្តភក្តិយូរអង្វែងរបស់លោកស្រី គឺលោកស្រី ឆយ សុនស៊ីល ចោទប្រកាន់ពីបទព្រហ្មទណ្ឌ និងល្មោភអំណាច៕