ស្របពេលដែល​ខ្សែភាពយន្ត «អាស្ទើរទឹកប៉ះខ្មោចបែកស្លុយ​» ប្រកា​ស​ថត​ជាផ្លូវការនោះ ចាងហ្វាងវ័យក្មេង​ផលិតកម្ម BKS លោក ឈុន សុវណ្ណភក្តី បានបាត់កាបូបលុយ កាលពីរាត្រីថ្ងៃទី​៣ ខែមករា ឆ្នាំ​២០១៦ បន្ទាប់ពីចេញ​ហូបអាហារនៅកោះពេជ្រ​។​

លោក ឈុន សុវណ្ណភក្តី បានថ្លែងប្រាប់តាមរយៈទូរស័ព្ទ​ឲ្យដឹងថា មុនដំបូងលោកបានទៅហូបអាហារ​នៅកោះពេជ្រ ជាមួយម្ចាស់​ស្ពន់ស័រ (Sponsor) ដោយនិយាយត្រូវរ៉ូវគ្នាហើយ​ លោកក៏បានចេញពីកោះពេជ្រប្រហែលម៉ោង​១០ ប៉ុន្តែមិនដឹងថា កាបូបលុយរបស់លោក បានជ្រុះបាត់ពីពេលណា​នោះទេ ដោយក្នុងនោះមានទឹកប្រាក់ចំនួន ៨០០ ដុល្លា​រ​អាម៉េរិក​។​

ចាងហ្វាងផលិតកម្មខាងលើបានបន្តថា ក្នុងកាបូបនោះ ក្រៅពីលុយនៅមាន ពែកមីឡាន កាតធានាគារ អត្តសញ្ញាណបណ្ណ ហើយក្រោយបាត់មានបុរសម្នាក់បានរើសបាន ហើយយករបស់របរលោក ទៅបញ្ចាំ តែសំណាងល្អហើយ ដែល​ខាងអ្នកបញ្ចាំនោះ បានស្គាល់ និង​បានខល​ឲ្យលោកយក​កាបូបវិញ តែលុយត្រូវបានបុរសនោះ យកទៅបាត់​។​ លោក បានចាត់ទុកការបាត់ថវិកា នេះ​ជាការរំដោះគ្រោះ អ្វីដែលសំខាន់មិនបានត់បង់ឯកសារក្នុងកាបូប។​

ដោយឡែក​លោក ឈុន ឡាត់ ដែលត្រូវ​ជា​ឪពុកលោក ភក្តី បានអះអាងថា លោកមិនបានស្តីបន្ទោស​លើកូននោះទេ ព្រោះគាត់ធំហើយ មានតែការលើកទឹកចិត្ត ឲ្យថវិកាបន្ថែម ដើម្បីឲ្យគាត់មានស្មារតី ផលិតខ្សែភាពយន្តមួយនេះឡើង ឲ្យជោគជ័យ ដើម្បីវាយលុកទីផ្សារ​ភាពយន្តខាងមុខ ។​

បញ្ជាក់ផងដែរថា ខ្សែភាពយន្ត «អាស្ទើរទឹក ប៉ះខ្មោចបែកស្លុយ» នេះមាន​តារាល្បីចូលរួមថត ក្នុងនោះមាន នាយគ្រឿន នាយចឺម នាងខ្ញុង កញ្ញា ពៅ លីដា និង តារាប្រុសស្រី ល្បីៗ ជាច្រើនទៀត ដែលចាយទុន ជាង ៦ម៉ឺនដុល្លារ​អាម៉េរិក៕​