Post News Media ព័ត៌មានសិល្បៈ និងកម្សាន្ត ពៅ លីដា បដិសេ...

ពៅ លីដា បដិសេធមានហ៊ុនក្នុងភោជនីយដ្ឋានហេងហេង២

ក្នុងពិធីបើកសម្ពោធភោជនីយដ្ឋានហេងហេង២ នៅទល់មុខភោជនីដ្ឋានវីហ្វ្រេនបឹងត្របែក គេកត់សម្គាល់ថាមានតែតារាសម្ដែងកញ្ញា ពៅ លីដា ម្នាក់ប៉ុណ្ណោះដែលខ្នះខ្នែងខុសប្លែកពីតារាសិល្ប:ផ្សេងទៀត ដែលបង្ហាញមុខជាភ្ញៀវកិត្តិយសនាយប់ថ្ងៃទី១២ កុម្ភ: ។

ក្រៅពីប្រកូកប្រកាសអញ្ជើញតារាសិល្ប: ឲ្យចូលរួមធ្វើជាភ្ញៀវកិត្តិយស នាងក៏ត្រូវគេឃើញកាន់ក្បាលមេក្រូឡើង ឃោសនាពីសេវាកម្មដោយផ្ទាល់ និងប្រើប្រព័ន្ធហ្វេសប៊ុកផ្សព្វផ្សាយពីភោជនីយដ្ឋានថ្មីនេះដែរ ដោយសកម្មភាពរបស់នាងគឺមិនខុសពីអ្នកមាន ចំណែកទទួលផលប្រយោជន៍។ យ៉ាងណាមិញ នាងបែរជាអះអាងថាខ្លួន មិនមានហ៊ុនសូម្បីមួយ ចំណែកជាមួយហាងនេះ។

ពៅ លីដា បានថ្លែងក្នុងពិធីបើកសម្ពោធថា ដោយសារតែនាងគោរពស្រលាញ់រាប់អានជាមួយម្ចាស់ភោជនីយដ្ឋានហេងហេងរហូតដល់មានទំនាក់ទំនងមិនខុសពីមីង និងក្មួយ ទើបនាងសម្រេចចិត្តបង្ហាញខ្លួន ធ្វើជាភ្ញៀវកិត្តិយស ហើយថែមទាំងជួយផ្សព្វផ្សាយ ដើម្បីឲ្យភោជនីយដ្ឋានមួយនេះ ទទួលបានការចាប់អារម្មណ៍ក្រោយការបើកសម្ពោធ។ នាងថានេះជាភោជនីយដ្ឋានថ្មីរបស់ហេងហេង ដែលនាងស្ម័គ្រចិត្តឃោសនាឲ្យអស់ពីលទ្ធភាព ជាពិសេសសម្រាប់អ្នកមានចំណូលចិត្តលើសាច់អាំង និងអាហារសមុទ្រ។ តែនាងថាក្រៅពីមិនមានភាគរយ ក៏មិនទទួលបានផលប្រយោជន៍ណាមួយពីថៅកែហាងនោះដែរ។ នាងថារវាងខ្លួន និងម្ចាស់ហាងអាចហៅថាមានទំនាក់ទំនងជិតស្និទ្ធិ ប៉ុន្តែមិនមានទំនាក់ទំនងស៊ីជម្រៅណាមួយ លើសពីការរាប់អាននោះទេ ថ្វីដ្បិតថានាងចេញមុខចេញមាត់ឃោសនា ឲ្យយ៉ាងពេញទំហឹង រហូតធ្វើឲ្យតារាសិល្ប:មួយចំនួន សង្ស័យពីទំនាក់ទំនងរបស់នាង ជាមួយគ្រួសាររបស់ថៅកែក៏ដោយ។ នាងថាភោជនីយដ្ឋានមិនមែនជាចំណូលចិត្តរបស់ខ្លួននោះទេ ទើបនាងមិនមានគម្រោងសុំឲ្យម្ចាស់ហាងមួយនេះ ជ្រោមជ្រែងឲ្យនាងមានភោជនីយដ្ឋាននាថ្ងៃអនាគត។

ក្នុងពិធីសម្ពោធហាងហេងហេង២ ដែលគេឃើញវត្តមានពៅ លីដា ចេញមុខយ៉ាងពេញទំហឹងនោះ មានការអញ្ជើញពីសំណាក់តារាសិល្ប:ដូចជាលោក ម៉ៅ ហាជី លោកខេន វណ្ណាថាត និងលោកទេព រិទ្ធីនី ពិធីករប៉ុស្ដិ៍លេខ៣ លោកស្រេង ប៉េងទី លោកយូឌីស្កូ កញ្ញាសូ អែនណា តារាសម្ដែង និងតារាក្មេងៗជាច្រើនទៀត៕