Post News Media ព័ត៌មានសិល្បៈ និងកម្សាន្ត មានទុក្ខជីតាស...

មានទុក្ខជីតាស្លាប់ តែផលិតករកម្មវិធីតែងប្រែត នៅតែប្រកាសជំហរ

ខណ:ដែលកម្មវិធី«ភ្ជុំមហាគ្រួសារសិល្ប:ខ្មែរ»អបអរបុណ្យភ្ជុំ ដែលត្រូវគេស្គាល់ថាជាកម្មវិធីតែងប្រែតបានប្រកាសឡើង ផលិតករដែលជាអ្នកផ្ដើមបង្កើតឲ្យមាននូវកម្មវិធីនេះ ត្រូវគេដឹងថាមានដំណឹងជីតាទទួលមរណភាពតែម្ដង។ យ៉ាងណាមិញ លោកបានប្រកាសនៅក្នុងវេទិកាសន្និសីទកាសែត កាលពីល្ងាចថ្ងៃទី២៩ កញ្ញាថា ខ្លួននៅតែដំណើរការកម្មវិធីអបអរបុណ្យភ្ជុំមួយនេះ ឲ្យលេចរូបរាងតាមការគ្រោងទុក្ខ ហើយឲ្យបានល្អបំផុត បើទោះជាលោកត្រូវមមាញឹកនឹងធ្វើបុណ្យជីតា ក្នុងពេលកម្មវិធីទាំងមូលកាន់តែខិតជិតដល់។

លោក ប៉ានី វិរ:រិទ្ធ ស្ថាបនិកកម្មវិធី««ភ្ជុំមហាគ្រួសារសិល្ប:ខ្មែរ»បានថ្លែងប្រាប់ថា នៅថ្ងៃទី៣ ខែតុលាខាងមុខនេះ លោកនឹងធ្វើឲ្យកម្មវិធីតែងប្រែតអបអរបុណ្យភ្ជុំទទួលបានការជោគជ័យជាងកាលពីលើកទី១ ដោយលោកបញ្ជាក់ថា ប្រសិនបើកម្មវិធីមួយនេះ មិនសូវទាក់ទាញអ្នកចូលរួមឲ្យបានកុះករតាមគ្រោងទុក ក៏លោកនឹងធ្វើឲ្យជោគជ័យដែរ។ ការសម្រេចបង្កើតឡើងនូវកម្មវិធីនៅក្នុងឆ្នាំនេះ លោកថា មិនមែនដើម្បីទាក់ទាញឲ្យមានភ្ញៀវកិត្តិយសមកចូលរួមទស្សនាឲ្យច្រើនកុះករនោះទេ ដោយសារតែកម្មវិធីរបស់លោកគឺផ្ដោតជាសំខាន់ លើការផ្សាយផ្ទាល់ ហើយផ្សាយផ្ទាល់ឲ្យបានល្អទាំងប្រព័ន្ធសំឡេង រូបភាព និងឈុតឆាកលើឆាកទៅវិញ ដើម្បីឲ្យមានការចាប់អារម្មណ៍នៅលើបណ្ដាញហ្វេសប៊ុក និងអ្នកទស្សនាតាមផេក។ លោកថាខ្លួនបានរៀបចំរៀបរយអស់ហើយ នូវប្រព័ន្ធភ្លើង ប្រព័ន្ធផ្សាយបន្តផ្ទាល់លើផេក និងការរៀបចំឆាកជាដើម ដោយឆាកទាំងមូល គឺលោកសម្រេចដេគ័រឲ្យមានទម្រង់បែបខ្មែរ មានការរំលេចនូវឧបករណ៍តន្ត្រីបុរាណខ្មែរនៅលើវេទិកា និងស្នើឲ្យអ្នកចូលរួមស្លៀកពាក់បែបខ្មែរចូលរួម។

លោកថាកម្មវិធីនេះ ត្រូវបានរៀបចំប្រព័ន្ធផ្សាយផ្ទាល់លើផេកធំៗរបស់ក្រុមហ៊ុនជាដៃគូ ដែលបានសហការចូលគ្នាច្រើនផេកទាំងព្រម ដោយក្រៅពីមានការច្រៀងរាំពាក់ព័ន្ធនឹងបទបុណ្យភ្ជុំ ក៏មានការសម្ដែងល្ខោនខោល និងដើរម៉ូដដោយផ្ទាល់ពីក្រុមសិល្បករសិល្បការិនីលើឆាក ក៏មានការចាក់បង្ហាញវីដេអូឃ្លីបបង្ហាញពីប្រវត្តិបុណ្យភ្ជុំ ពិធីពូនភ្នំខ្សាច់ របៀបធ្វើនំខ្មែរជាដើម។ ក្នុងនោះកម្មវិធីសំខាន់គឺការរំលេចនូវតួអង្គខ្មោចល្បីៗនៅក្នុងរឿងនិទានខ្មែរ ដើម្បីឲ្យបេលបន្តផ្ទាល់លើផេកជាច្រើនព្រមគ្នា ទទួលបានការចាប់អារម្មណ៍។ លោកថាកម្មវិធីទាំងនោះនឹងត្រូវដំណើរការតាមការគ្រោងទុក បើទោះជាក្នុងពេលនេះ លោកមានទុក្ខរឿងជីតាបង្កើតទទួលមរណភាព ដែលធ្វើឲ្យផ្លូវចិត្តរបស់លោករងការប៉ះពាល់។ លោកអះអាងថាព្រឹត្តិការណ៍មួយនេះ មានការសហការពេញទំហឹងពី«គ្រួសារតារាកម្ពុជា» ដោយដៃគូដែលជាក្រុមហ៊ុនជំនាញខាងផ្សាយបន្តផ្ទាល់លើផេកធំៗ និងក្រុមហ៊ុនដែលមានឆន្ទ:ក្នុងការផលិតនូវកម្មវិធីនេះក៏បានឯកភាពគ្នា ទើបធ្វើឲ្យលោកប្រកាសធ្វើកម្មវិធីទាំងមូលឲ្យខ្លាំង និងឲ្យមានការទទួលស្គាល់នៅពេលផ្សាយចេញ។ លោកថាគោលបំណងធំបំផុតក្នុងរៀបចំកម្មវិធីនេះឡើង គឺដើម្បីមានការដឹងឮកាន់តែច្រើនពីទំនៀមទំលាប់របស់ខ្មែរ នៅក្នុងឱកាសបុណ្យភ្ជុំ ដោយលោកប្រកាសថាដៃគូដែលបានចូលរួម សុទ្ធតែស្ម័គ្រចិត្តរំលេចកម្មវិធីនេះ ដោយមិនមានទទួលផលចំណេញ ខណ:ដែលក្រុមហ៊ុនរបស់លោក ដែលជាក្រុមហ៊ុនរៀបចំកម្មវិធី និងជំនាញខាងឆាកភ្លើងភ្លេង ក្រៅពីធ្វើកម្មវិធីទាំងមូលដោយមិនគិតថ្លៃហើយ គឺត្រូវចំណាយថវិកាផ្ទាល់ខ្លួនបន្ថែមទៀត។

នៅក្នុងវេទិកាសន្នសីទកាសែតនាថ្ងៃនោះ ដៃគូដែលបានបង្ហាញខ្លួន សុទ្ធតែបានបង្ហាញពីការតាំងចិត្ត ធ្វើឲ្យកម្មវិធីទាំងមូល ទទួលបានជោគជ័យ។ យោងតាមការរៀបចំ កម្មវិធីទាំងមូលនឹងតម្រូវឲ្យអ្នកចូលរួមទាំងអស់ ស្លៀកពាក់ជាប្រពៃណីខែភ្ជុំ ហើយនៅលើវេទិកាមានការដើរម៉ូដបង្ហាញពីសំលៀកបំពាក់ទៅវត្តតាមសម័យកាល បង្ហាញពីតួអង្គប្រែតល្បីៗរបស់ខ្មែរ ក្រៅពីចាក់ឃ្លីបបង្ហាញពីប្រវត្តិក្នុងជំនឿខ្មែរផ្សេងៗ។ កម្មវិធីត្រូវបានប្រកាសថានឹងចាប់ផ្ដើមពីម៉ោង៣រសៀលរហូតដល់ម៉ោង៨យប់ ដោយការផ្សាយផ្ទាល់ នឹងត្រូវធ្វើឡើងដូចគ្នានឹងប្រព័ន្ធបន្តផ្ទាល់តាមទូរទស្សន៍ ហើយផ្សាយផ្ទាល់ចម្រុះគ្នាលើផេកច្រើនក្នុងពេលតែមួយ ដើម្បីឲ្យមានការដឹងឮសុះសាយ៕

Loading...