ក្នុងពិធីសម្ពោធរឿង «ទារុណកម្មខ្មោច» របស់អ្នកនាងចន ច័ន្ទលក្ខិណា កាលពីល្ងាចថ្ងៃទី២៥ កម្ភ: នៅផ្សារទំនើបអ៊ីអន១ សិល្បការិនីរូបនេះ បានអះអាងថា ភាពយន្តខ្មែរនាពេលចុងក្រោយមានការថយកម្លាំងយ៉ាងគំហុក ដោយសារតែខ្វះការជ្រោមជ្រែង និងយកចិត្តទុកដាក់ពីអ្នកសិល្ប:ដូចគ្នា ជាពិសេសចំពោះតារាសិល្ប: ដែលយល់ថាខ្លួនមិនបានចូលរួមសម្ដែង គឺមិនគួរនឹងចូលរួមលើកស្ទួយស្នាដៃ រឿងនោះតែម្ដង។ អ្នកនាងថា មានតែអ្នកសិល្ប:ប៉ុណ្ណោះ ដែលជួយបំផុស និងលើកស្ទួយឲ្យភាពយន្តមួយ ក្លាយជារឿងពុះកញ្ជ្រោល ទើបធ្វើឲ្យស្នាដៃមានមហាជនចាប់អារម្មណ៍ និងចង់គាំទ្រ។

អ្នកនាងចន ច័ន្ទលក្ខិណា ម្ចាស់ផលិតកម្មសិល្ប:ភាពយន្ត ដែលជាអ្នកសហការផលិតរឿង «ទារុណខ្មោច» ជាមួយផលិតករលោក ហ៊ុយ យ៉ាឡេង បានថ្លែងបញ្ជាក់ថា បើស្នាដៃមួយមិនមានការចូលរួមបំផុស ពីអ្នកសិល្ប:ឲ្យបានស្រុះគ្នា គឺមិនខុសពីធ្វើឲ្យស្នាដៃនោះ ដួលរលំបន្តិចម្ដងៗ ហើយបង្កឲ្យប៉ះពាល់ដល់ការងារសម្ដែងរបស់តារាទាំងនោះ ជាពិសេសក្នុងពេលដែលស្នាដៃមួយ ដាក់បញ្ចាំងមិនជោគជ័យ គឺបណ្ដាផលិតករ នឹងចាប់ផ្ដើមបញ្ចប់ការផលិតបន្តិចម្ដងៗ ជាក់ជាមិនខាន។ អ្នកនាងថា គឺដល់ពេលហើយ ដែលតារាសិល្ប:ត្រូវរួមកម្លាំងគ្នា ដោយស្នាដៃណា ក៏គួរតែជួយបំផុស ដើម្បីឲ្យបានដឹងកាន់តែទូលាយដល់ស្រទាប់មហាជន ហើយវាច្បាស់ណាស់ថា ភាពយន្តដែលមានចូលរួមបំផុស ពីអ្នកសិល្ប: គឺពិតជាមានអ្នកគាំទ្រច្រើនជាងភាពយន្ត ដែលខ្វះអ្នកសិល្ប:ចូលរួមបំផុស។

អ្នកនាងប្រកាសថាដរាបណា អ្នកនាងនៅតែមានតំណែងជាប្រធានសមាគមអ្នកនាង នឹងបន្តផលិតភាពយន្ត ដើម្បីជួយឲ្យតារាសិល្ប: មានការងារឲ្យបានច្រើន ក៏ដូចជាដើម្បីឲ្យវិស័យភាពយន្តខ្មែរ មានការរីកចម្រើនខ្លាំងផង។ ការបប្រកាសរបស់អ្នកនាង គឺស្របពេលដែលគេសម្គាល់ថា តារាសិល្ប:រមែងចាំមើលបំណាំគ្នា និងមិនសូវស្រុះដៃគ្នា ក្នុងលើកស្ទួយភាពយន្ត ដែលខ្លួនមិនបានសម្ដែងនោះទេ ដោយតារាមួយចំនួនមិនត្រឹមតែមិនជួយបំផុស ពីស្នាដៃទាំងនោះ គឺថែមទាំងបណ្ដុះបង្អាប់ពីស្នាដៃទាំងនោះផង។ អ្នកនាងសប្បាយចិត្តយ៉ាងខ្លាំង ដែលក្នុងពិធីសម្ពោធរឿង «ទណ្ឌកម្មខ្មោច» ដែលជាស្នាដៃរបស់ផលិតកម្មអ្នកនាង មានតារាសិល្ប:ចូលរួមកុះករ ដោយអ្នកនាងបញ្ជាក់ថា សកម្មភាពស្រុះគ្នា ពីតារាសិល្ប:នោះហើយ ដែលជាកម្លាំងចិត្តរបស់ផលិតករ ហើយឈានដល់ការទាក់ទាញមហាជន ឲ្យចាប់អារម្មណ៍ ចំពោះស្នាដៃណាមួយ។

នៅក្នុងពិធីនោះ គេកត់សម្គាល់ថា មានតារាសិល្ប:ស្ទើរមួយចំហៀងប្រទេស ចូលរួមជាភ្ញៀវកិត្តិយស ដោយតារាសិល្ប: និងផលិតករដែលបានបង្ហាញខ្លួន ក៏សុទ្ធសឹងតែជាតារាល្បីៗ នៅក្នុងពិភពសិល្ប:នោះផង។ នៅក្នុងពិធីនោះ គេឃើញអ្នកនាង មានពិធីដង្ហែរក្បួនលោក តាគង់ ណៃ ដែលតារាចម្រៀងចាប៉ីដងវែង ដើម្បីឲ្យលោក បានទទួលកិត្តិយស ក្នុងនាមជាវិរ:សិល្បករមួយរូបនោះផង មុនពេលឲ្យលោកបកស្រាយចាប៉ីដងវែង នៅលើវេទិកា។

លោក ហ៊ុយ យ៉ាឡេង អ្នកដឹកនាំរឿង និងជាអ្នកនិពន្ធ បានអះអាងថា គ្មានអ្វីសប្បាយចិត្តជាងស្នាដៃរបស់ខ្លួន ទទួលបានការគាំទ្រ និងចូលរួមយ៉ាងច្រើនកុះករពីតារាសិល្ប:នោះទេ ដោយលោកបានចាត់ទុកថា ស្នាដៃរឿង «ទារុណកម្មខ្មោច»ដែលគ្រោងនឹងដាក់លក់សំបុត្រ នៅថ្ងៃទី២៨ កុម្ភ:នេះ នឹងទទួលបានការចាប់អារម្មណ៍ខ្លាំងក្លា ពីស្រទាប់មហាជននោះផង។ លោកថាក្ដីរំពឹងនៅមិនទាន់មានខ្ពស់នោះទេ ប៉ុន្តែផ្អែកតាមការគាំទ្រ ពីតារាសិល្ប:យ៉ាងច្រើនកុះករ ក្នុងថ្ងៃសម្ពោធ គឺភាពយន្តនេះ បានធ្វើឲ្យលោកមើលឃើញពីការសង្ឃឹមខ្ពស់ ស្របគ្នាដែលភាពយន្តនេះ ក៏រំលេចពីសម័យប៉ុលពត ហើយលាយលំ ដោយភាពភ័យរន្ធត់តាំងពីដើមដល់ចប់ផង៕