ផ្ទះ ព័ត៌មានសិល្បៈ និងកម្សាន្ត សិល្បករចូលរួម...

សិល្បករចូលរួមបំផុស សិល្បៈបុរាណ ក្នុងទិវារវប្បធម៌ជាតិ

0

ទិវារវប្បធម៌ជាតិលើកទី២២ ដែលបានធ្វើឡើងនៅមជ្ឈមណ្ឌលកោះពេជ្រ កាលពីថ្ងៃទី៣ មីនា ឆ្នាំ២០២០ គ្រួសារតារាកម្ពុជា បានដឹកនាំសិល្បករតប តាមការអញ្ជើញរបស់ក្រសួងវប្បធម៌មួយក្រុមចូលរួម។ នៅក្នុងឱកាសនោះ សមាជិកភាគច្រើន បានទទូចឲ្យមានការបំផុសពីទម្រង់សិល្ប:វប្បធម៌បុរាណ របស់ខ្មែរឲ្យបានច្រើន ក្នុងស្រទាប់មហាជន ជាពិសេស គឺការបង្ហាញអត្តសញ្ញាណនូវវប្បធម៌របស់ខ្លួន នៅគ្រប់សកម្មភាព ដើម្បីបង្ហាញពីការលើកស្ទួយសិល្ប:វប្បធម៌របស់ជាតិ។

លោក ផាត់ តារារដ្ឋ ស្ថាបនិកគ្រួសារតារាកម្ពុជា បានថ្លែងបញ្ជាក់ថា ធៀបនឹងរយ:ពេលមុន យុវវ័យ ពោលគឺមហាជនច្រើន មកហើយ ដែលចាប់អារម្មណ៍លើកស្ទួយសិល្ប:វប្បធម៌បុរាណខ្មែរ តាមរយ:ការសហការគ្នាគ្រងឈុតបែបបុរាណក្នុងកម្មវិធីធំៗ ដោយស្លៀកចងក្បិន ឬ គ្រងឈុតក្នុងសម័យកាលណាមួយ នៅក្នុងកម្មវិធីជប់លៀង ឡើងផ្ទះ និងមង្គលការជាដើម ដើម្បីបង្ហាញឲ្យអន្តរជាតិ និងក្មេងជំនាន់ក្រោយ មើលឃើញថា អត្តសញ្ញាណរបស់ដូនតាខ្មែរ មានតម្លៃមិនអាចកាត់ថ្លៃបាន ក្នុងផ្នត់គំនិតមហាជនសម័យទំនើប។

ក្នុងនោះ របាំបុរាណ ល្ខោនបាសាក់ និង ល្ខោនខោលជាដើម ក៏ត្រូវគេលើកស្ទួយជាថ្មី ក្នុងកម្មវិធីសម្ពោធធំៗផងដែរ ដែលនេះ គឺជាអ្វី ដែលលោក និង សមាជិកគ្រួសារតារាកម្ពុជា ភាគច្រើនចង់បាន។ លោកថា គ្រួសារតារាកម្ពុជា គឺជាបណ្ដុំអ្នកសិល្ប:រាប់ទាំងតារាល្បីៗ និងតារាថ្មី ដើម្បីរួមគ្នាធ្វើសកម្មភាព ដែលមានតម្លៃវប្បធម៌ ជាពិសេសបំផុស ឲ្យមហាជនចេះស្រទ្បាញ់សិល្ប:បុរាណ តាមរយ:ដែលគ្រួសារតារាកម្ពុជា បានរៀបចំកម្មវិធីគ្រងឈុតបុរាណ និង ប្រកួតឈុតបុរាណជារឿយៗរៀងរាល់មួយឆ្នាំម្ដង នាពេលកន្លងមក។ លោកថា កម្មវិធីទិវាវប្បធម៍ មានតម្លៃមិនអាចកាត់ថ្លៃបាន ព្រជាការបំផុសឲ្យមហាជចាប់អារម្មណ៍ និងមើលឃើញថាសិល្ប:បុរាណខ្មែរ មិនថារបាំ យីគេ ល្ខោន ចម្រៀង និងសំលៀកបំពាក់ ដែលជាអត្តសញ្ញាណជាតិជាដើម មានជីវិតរស់រវើកជានិរន្ត។

អ្នកនាង លី ម៉ារីណា បញ្ជាក់ថា នេះជាកម្មវិធីថ្នាក់ជាតិមួយ ដែលសិល្បករខ្មែរមកពីគ្រប់ទិសទី មានឱកាសបង្ហាញ នូវអត្តសញ្ញាណជាតិ តាមរយ:ការបង្ហាញសំលៀកបំពាក់បែបខ្មែរ និងលើកស្ទួយវប្បធម៌ប្រពៃរបស់ខ្មែរ។ អ្នកនាងថា សំលៀកបំពាក់ខ្មែរ មិនត្រឹមតែស្អាតប៉ុណ្ណោះទេ តែក៏ថ្លៃថ្នូរក្នុងស្រទាប់ជាតិ និងអន្តរជាតិផងដែរ។

ការចូលរួមរបស់គ្រួសារតារាកម្ពុជា ក្នុងកម្មវិធីវប្បធម៌ជាតិលើកនេះ គឺជាការសហការរួមគ្នា បង្កើតចំណងសាមគ្គី ក៏ដូចជាការ ពង្រីកស្នាដៃនៅក្នុងសង្គមសិល្ប: លើកស្ទួយដល់វប្បធម៌ជាតិ៕

មតិយោបល់