ភ្នំពេញ: សមាគមមិត្តសិល្ប:ស្ម័គ្រចិត្តជួយសង្គម បានសម្រេចចិត្ត ធ្វើការប្តឹងទៅកាន់ម្ចាស់គណនី មួយ បន្ទាប់ពីរូបគេបានប្រើប្រាស់បណ្តាញសង្គមហ្វេសប៊ុក បង្ហោះឃ្លិបវីដេអូ ជេរត្មិះដៀល ទៅកាន់សមាគម និងជាពិសេស អ្នកនាង ចន ចាន់លក្ខិណា តែម្តង ។
សមាគមមិត្តសិល្ប:ស្ម័គ្រចិត្តជួយសង្គម បានសរសេរនៅលើហ្វេសប៊ុកខ្លួនថា សូមគោរពជម្រាបជូនសាធារណ:ជន មេត្តាជ្រាបថា ក្រោយពីបានមើលឃើញនូវវីឌីអូ របស់ account ឈ្មោះ ខាងក្រោម ដែលបានរិះគន់ដោយងងឹតងងុលតាមបែបជាមនុស្សអគតិ ប្រើពាក្យអសុរោះ និងធ្វើការចោទប្រកាន់មកលើប្រធានសមាគម។ សមាគម សូមធ្វើការច្រានចោលចំពោះការចោទប្រកាន់ដោយគ្មានហេតុផល និង មូលដ្ឋានច្បាស់លាស់របស់បុគ្គលរូបនេះ ។
សមាគមមិត្តសិល្ប:ស្ម័គ្រចិត្តជួយសង្គម បានបន្តថា ទង្វើនេះធ្វើឡើងក្នុងចេតនាទុច្ចរិតដើម្បីបរិហាកេរ្តិ៍ មួលបង្កាច់កេរ្តិ៍ប្រធានសមាគមតែប៉ុណ្ណោះ។ ទង្វើខាងលើនេះ មិនត្រឹមតែប៉ះពាល់ដល់កិត្តិយស សេចក្តីថ្លៃថ្នូរបស់បុគ្គលនិងសមាគមប៉ុណ្ណោះទេ តែវាជាអំពើផ្ទុយទៅនឹងច្បាប់ផងដែរ។ សមាគមនឹងចាត់វិធានការប្តឹងបុគ្គលនេះតាមច្បាប់។
សូមបញ្ជាក់ផងដែរថា បុរសដែលប្រើប្រាស់គណនី រាជបុត្រ សូរ្យកាយ្យ បានជេប្រទេចទៅកាន់ចន ចាន់លក្ខិណា កាលពីព្រឹកថ្ងៃសុក្រ ទី១២ ខែសីហា ឆ្នាំ២០១៦ ៕
មតិយោបល់