(ភ្នំពេញ)៖ កំពូលតារាចម្រៀងស្រីប្រចាំប្រទេសកម្ពុជា អ្នកនាង ឱក សុគន្ធកញ្ញា បាននឹងកំពុងតែធ្វើឲ្យហ្វេនៗមិនតិចនាក់នោះទេ មានអារម្មណ៍អន្ទះសារចង់ឃើញស្នាដៃចម្រៀងថ្មីរបស់នាង ពោលគឺបន្ទាប់ពីបានឃើញរូបភាពមួយសន្លឹក ដែលផលិតកម្មរស្មីហង្សមាសបានបង្ហោះ បង្ហាញពីតារាចម្រៀង ឱក សុគន្ធកញ្ញា គ្រងនូវឈុតសម្លៀកបំពាក់បុរាណខ្មែរ យ៉ាងសមសួន ស្រស់ស្អាត និងមើលទៅពិតជារាំងមាំផងដែរ។
គេមិនដឹងនៅឡើយទេថា តើស្នាដៃចម្រៀងថ្មីរបស់ តារាចម្រៀង ឱក សុគន្ធកញ្ញា ជាប្រភេទចង្វាក់អ្វី ប៉ុន្តែបើមើលទៅលើការតុបតែងខ្លួន និងសម្លៀកបំពាក់ គឺទំនងជាប្រភេទចម្រៀងដែលបង្ហាញពីវប្បធម៌ អរិយធម៌របស់ខ្មែរ ដ៏ផូរផង់។ ខណ:ក្នុងផេកផ្លូវការរបស់ហង្សមាស គ្រាន់តែសរសេរពាក្យយ៉ាងខ្លីថា «តើ Idol នឹងមានអ្វីពិសេសត្រៀមបង្ហាញជូនលោកអ្នក? កុំភ្លេចតាមដានទាំងអស់គ្នា! ឆាប់ៗនេះ…»។
គួរជម្រាបថា ឱក សុគន្ធកញ្ញា គឺជាតារាចម្រៀងដែលមានកេរ្តិ៍ឈ្មោះបោះសំឡេងម្នាក់របស់កម្ពុជា ត្បិតថាតារារូបនេះមានគ្រួសារ និងមានកូនប្រុសជាទីស្រឡាញ់ម្នាក់ទៅហើយក្តី តែភាពល្បីល្បាញនៅក្នុងវិស័យសិល្ប: ត្រូវបានគេមើលឃើញថា នៅតែរក្សាបានជានិច្ច៕
មតិយោបល់