ភ្នំពេញ: កាលពីថ្ងៃទី២២ កញ្ញា ក្រុមសិល្ប:បុរាណ រួមមានក្រុមល្ខោនស្បែកធំ និងក្រុមសិល្ប:បុរាណជាច្រើនទៀត បានប្រារព្ធពិធីក្រុងពាលី និងសុំខមាលទោសបុព្វបុរសដែលជាសិល្ប:ករ និងសិល្ប:ការិនី ដែលបានចែកឋានទៅ។ ពិធីនេះប្រារព្ធឡើង ដើម្បីបួងសួងសុំឲ្យវិញ្ញាណរបស់បុព្វបុរសជាអ្នកបង្កើត និងឃុំគ្រងសិល្បបុរាណមកជួយសណ្ឋិត និងថែរក្សាដល់សិល្បករសិល្បការិនីជំនាន់ថ្មី ឲ្យបន្តរក្សាសិល្ប:បុរាណឲ្យបានគង់វង្ស។ ពិធីនេះដែរ ក៏ប្រារព្ធដើម្បីសុំឲ្យវិញ្ញាណបុព្វបុរសជួយឲ្យអ្នកស្នងសិល្ប:បុរាណទាំងអស់ឲ្យទទួលជោគជ័យ ក្នុងការរៀបចំពិធីបុណ្យបេតិកភណ្ឌលើកទី៣ ដែលគ្រោងប្រារព្ធឡើងនៅថ្ងៃទី១៤ ដល់១៦ តុលាខាងមុខ។

តំណាងមន្ទីរវប្បធម៌បានអះអាងថា ហេតុផលដែលនាំឲ្យមានការប្រារព្ធពិធីសន្និសីទ និងសុំខមាលទោសដល់ព្រលឹងបុព្វបុរសផ្នែកសិល្ប:នៅថ្ងៃទី២២ កញ្ញានេះ គឺដោយសារតែក្រុមសិល្ប:ត្រូវការជ្រើសយកថ្ងៃព្រហស្បតិ៍ ដែលជាថ្ងៃថ្វាយគ្រូ និងដោយសារតែនៅថ្ងៃព្រហស្បតិ៍ក្រោយៗជាថ្ងៃកៀកនឹងបុណ្យភ្ជុំ។ លោករំពឹងថា ពិធីបុណ្យបេតិកភណ្ឌក្នុងពេលខាងមុខនឹងទទួលជោគជ័យ ដោយសារតែពិធីបុណ្យនោះ ជាការថែរក្សាវប្បធម៌ជាតិ និងដើម្បីបំផុសអ្នកជំនាន់ក្រោយឲ្យកាន់តែស្គាល់សិល្ប:បុរាណ។ ព្រឹត្តិការណ៍នេះក៏មានការលក់សំបុត្រ ដើម្បីយកថវិកាមួយចំនួនជួយមន្ទីរពេទ្យកុមារអង្គរ នៅខេត្តសៀមរាបដែលប្រឈមនឹងការខ្វះខាតនោះផងដែរ។

លោក សុះ ម៉ាច ប្រធានសមាគមសិល្បករខ្មែរ បានទទូចឲ្យមានការចូលរួមទស្សនាការសម្ដែងសិល្ប:នៅថ្ងៃទី១៤ ដល់១៦ឋ តុលានោះឲ្យបានច្រើន ដើម្បីលើកស្ទួយដល់សិល្ប:បុរាណខ្មែរជាពិសេស គឺល្ខោនស្បែកធំ និងទម្រង់សិល្ប:បុរាណជាច្រើនទៀត។ លោកថា ព្រឹត្តិការណ៍បុណ្យបេតិកភណ្ឌលើកទី៣ក្នុងឆ្នាំនេះ លោករំពឹងថានឹងកាន់តែមានគាំទ្រពីស្រទាប់មហាជន ជាពិសេសគឺពីអ្នកស្រឡាញ់សម្បត្តិវប្បធម៌នៅកម្ពុជា៕