ស្ទឹងត្រែងៈ ដោយមានការឯកភាពពីលោកឧត្តមសេនីយ៍ ម៉ៅ តារា ស្នងការនគបាលខេត្តស្ទឹងត្រែង ទើបកម្លាំងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្ត បានដឹកនាំកម្លាំងក្រោមឱវាទ ចុះដោយផ្ទាល់ដល់ហាងលក់ផលិតផលបារីនានានៅក្នុងទឹកដីខេត្តស្ទឹងត្រែង កាលពីពេលថ្មីនេះ ដើម្បីធ្វើការណែនាំ នឹងព្រមានពីការផាកពិន័យចំពោះអាជីវករលក់ដុំ និងលក់រាយទាំងអស់ដែលនៅតែបន្តលក់ផលិតផលបារីខុសច្បាប់ ដែលពុំមានបោះពុម្ពសារព្រមានសុខភាពជាភាសាខ្មែរ និងជារូបភាពនោះ។

ក្នុងប្រតិបត្តិការចុះធ្វើការណែនាំ នឹងព្រមានពីការផាកពិន័យចំពោះអាជីវករលក់ដុំ និងលក់រាយនូវផលិតផលបារីខុសច្បាប់ ដែលពុំមានបោះពុម្ពសារព្រមានសុខភាពជាភាសាខ្មែរ និងជារូបភាពនោះ លោក ហ៊ីង មច្ចរម្យ នាយរងការិយាល័យនគរបាលប្រឆាំងបទល្មើសសេដ្ឋកិច្ច បានឲ្យដឹងថា អាជីវករទាំងអស់មិនត្រូវរក្សាទុក ឬទិញចូលនូវផលិតផលបារីខុសច្បាប់ ដែលពុំមានបោះពុម្ពសារព្រមានសុខភាពជាភាសាខ្មែរ និងជារូបភាពលើកញ្ចប់បារីនោះទេ ហើយអាជីវករត្រូវបង្វិលបារី ដែលខុសច្បាប់ទាំងនោះទៅឲ្យក្រុមហ៊ុនដើមវិញ ដើម្បីជៀសផុតពីការផាកពិន័យជាយថាហេតុណាមួយ ព្រោះថា អនុក្រឹត្យបានចូលជាធរមានរួចរាល់ហើយ។ ម៉្យាងវិញទៀត ក្រុមហ៊ុនទាំងឡាយដែលបានលក់បារីពុំមានសារព្រមានសុខភាពជារូបភាពទៅអាជីវករនោះ គួរត្រូវមានការទទួលខុសត្រូវខ្ពស់ហើយធ្វើការប្តូរផលិតផលថ្មី ដែលស្របច្បាប់ទៅឲ្យអាជីវកររបស់ខ្លួនវិញ ដើម្បីបង្ហាញពីការទទួលខុសត្រូវចំពោះអាជីវកររបស់ខ្លួន។

លោកបានកត់សម្គាល់ថា ចំនួនផលិតផលបារីកំពុងលក់ទីផ្សារដែលមានសារព្រមានសុខភាពជារូបភាពត្រឹមត្រូវតាមច្បាប់ គឺនៅមានកម្រិតទាបបំផុតនៅឡើយចំពោះបារី MEVIUS, ARA, LUXURY, ALAIN DELON, ចំណែកបារី FINE របស់ក្រុមហ៊ុនហួតត្រាកូ វិញ គេឃើញមានស្ទើរតែ ១០០% ទៅហើយ។

គេសង្កេតឃើញថា ក្រុមហ៊ុនថ្នាំជក់អន្តរជាតិធំៗជាច្រើន នៅតែបំពានអនុក្រឹត្យរាជរដ្ឋាភិបាល ដោយបន្តលក់ និងបណ្តែតបណ្តោយឲ្យផលិតផលខុសច្បាប់របស់ខ្លួនលក់នៅលើទីផ្សារ ទោះបីក្រុមហ៊ុនទាំងនោះធ្លាប់ទទួលការព្រមានពីក្រសួងសុខាភិបាល កាលពីថ្ងៃទី៦ ខែតុលា ឆ្នាំ២០១៦ ជាលាយលក្ខអក្សរក៏ដោយ។

ពាក់ព័ន្ធបញ្ហានេះដែរ ក្រសួងសុខាភិបាល នឹងចាត់វិធានការឲ្យមានប្រសិទ្ធិភាព និងឆាប់រហាស់យ៉ាងណា ដើម្បីបញ្ចប់ការរំលោភច្បាប់ ក៏ដូចជាអនុក្រឹត្យរបស់រាជរដ្ឋាភិបាល ពីសំណាក់របស់ក្រុមហ៊ុនបារី ដែលនៅតែចរាចរផលិតផលខុសច្បាប់របស់ខ្លួន ដែលពុំមានបោះពុម្ពសារព្រមានសុខភាពភាសាខ្មែរ និងជារូបភាព នៅលើកញ្ចប់បារី ហើយបន្តមាននៅលើទីផ្សារហូតមកទល់ពេលនេះ៕