វាមិនមែនជារឿងថ្មីទេ ដែលក្រដាសប្រាក់ ១០០ រៀលត្រូវបាន អាជីវករ រកស៊ីក្នុងខេត្តមណ្ឌលគិរី លែងទទួលយក ក្នុងការចាយវាយ ដោយពួកគាត់លើកយកមូលហេតុពិបាក ក្នុងការទុកដាក់ ។
បន្ទាប់ពីសារព័ត៌មានក្នុងស្រុក មួយបានចុះផ្សាយថា ក្រដាសប្រាក់ ១០០រៀល ប្រជាជននៅកោះញែកលែងចាយនោះ បានធ្វើឲ្យ អ្នកលេងបណ្តាញសង្គមហ្វេសប៊ុក មានការចាប់អារម្មណ៍យ៉ាងខ្លាំង ក៏ប៉ុន្តែរឿងនេះមិនមែនជារឿងថ្មីនៅមណ្ឌលគិរី នោះទេ តែវាជារឿងចាស់ ជិតពាក់កណ្តាលអាយុកាល១ទសវត្សរ៍ ទៅហើយ ។
ប្រភពច្បាស់ការដ៏កក់ក្តៅ ពីប្រជាជនរស់នៅក្នុងខេត្តមណ្ឌលគិរី សូមមិនបញ្ចេញឈ្មោះ បានថ្លែងប្រាប់ Post News តាមរយៈសារអេឡិចត្រូនិក ហ្វេសប៊ុក ឲ្យដឹងនៅព្រឹកថ្ងៃទី១៣ ខែធ្នូ ឆ្នាំ២០១៦ ឲ្យដឹងថា មិនត្រឹមតែនៅកោះញែកនោះទេ គឺនៅទូទាំង ខេត្តមណ្ឌលគិរីតែម្តង ដែលអាជីវករ លែងទទួលយកក្រដាស់ប្រាក់ ១០០រៀល ។
ប្រភពខាងលើបានបន្តថា រឿងអាជីវករ លែងចាយក្រដាស់ប្រាក់ ១០០ នេះបើរាប់គឺមានរយៈពេល ៥ឆ្នាំទៅហើយ ដែលពួកគាត់លែងទទួលក្រដាស់ប្រាក់ ដែលជាប្រភេទក្រដាស់ ដ៏តូចបំផុត ក្នុងប្រទេសកម្ពុជា នាពេលបច្ចុប្បន្ន។
ប្រជាពលរដ្ឋខាងលើបានលើកពីហេតុផល ដែលពួកអាជីវករ លែងទទួល ដោយសារតែ ពិបាកទុកដាក់ពេក តែបើសិនជា តម្លៃទំនិញ ក្រោម៥០០ រៀលពួកគាត់ តំឡើងថ្លៃដល់ ៥០០ រៀលតែម្តង ។ ម្យ៉ាងវិញទៀត បើយកក្រដាស់ប្រាក់១០០ ៥សន្លឹក ស្មើ ៥០០ រៀលទៅទិញ ក៏មានអាជីវករតិចទៀតបំផុត ដែលទទួលយក ហើយអាជីវករជាច្រើនទៀត មិនទទួលយក ដោយលើកយកមូលហេតុពិបាកខាងលើមកប្រាប់។ទោះបីជាយ៉ាងនេះក្តី សម្រាប់ធនាគារនៅក្នុងទូទាំងខេត្តមួយនេះ នៅតែទទួលចាយវាយ ជាធម្មតា គ្មានអ្វីប្រែប្រួល ៕
មតិយោបល់