ព្រះសីហនុៈ ជនសង្ស័យដែលជាជនជាតិអាមេរិកកាំងម្នាក់ ត្រូវបានកម្លាំងនគរបាលចរាចរណ៍ជើងគោក នៃស្នងការដ្ឋាននគរបាលខេត្តព្រះសីហនុ ធ្វើការចាប់ខ្លួន ក្រោយពីត្រួតពិនិត្យរកឃើញ ថ្នាំញៀនជិត១០កញ្ចប់ រួមនិងសម្ភារៈពាក់ពន្ធ័នឹងការជួញដូរគ្រឿងញៀនមួយចំនួនជាប់នឹងខ្លួន ។

ការចាប់ខ្លួននេះបានធ្វើឡើងកាលពីវេលាម៉ោង ៩និង៤០នាទី យប់ថ្ងៃទី៦ ខែមករា ឆ្នាំ២០១៦ ស្ថិតនៅចំណុចP6 រង្វង់មូលតោ២ ស្ថិតនៅភូមិ២ សង្កាត់លេខ៤ ក្រុងព្រះសីហនុ ខេត្តព្រះសីហនុ។

ជនសង្ស័យដែលចាប់ខ្លួនបានខាងលើ មានឈ្មោះ Soto Michael P ឆ្នាំកំណើត១៩៤៩ ជនជាតិអាមេរិកកាំង មុខរបរគ្រូបង្រៀនអង់គ្លេសចូលនិវត្តន៍នៅប្រទេសចិន មកនៅខេត្តព្រះសីហនុចំនួន១០ខែមកហើយ ស្នាក់នៅផ្ទះសំណាក់ Power house នៅភូមិ៣ សង្កាត់លេខ៤ ក្រុងព្រះសីហនុ។

ដកហូតបានវត្ថុតាងរួមមាន ថ្នាំញៀនចំនួន៨កញ្ចប់តូច និងកញ្ឆា១កញ្ចប់ , ជញ្ជីងថ្លឹងថ្នាំញៀន ចំនួន១គ្រឿង ,សឺរាងចាក់ចំនួន២ រួមនិងវត្ថុតាងមួយចំនួនទៀត។

បច្ចុប្បន្នកម្លាំងនគរបាលជំនាញ កំពុងធ្វើការសាកសួរ និងបន្តត្រួតពិនិត្យកន្លែងជនសង្ស័យស្នាក់នៅដើម្បីស្វែងរកវត្ថុតាងបន្ថែម និងចាត់ការតាមនីតិវិធីច្បាប់៕