បន្ទាយមានជ័យៈ នៅរសៀលថ្ងៃទី០៦ខែឧសភាឆ្នាំ២០១៦នេះលោក សួន បវរ អភិបាលខេត្តបន្ទាយមានជ័យនិងលោក អ៊ី ឡុង សមាជិកក្រុមប្រឹក្សាខេត្តបានរៀបចំពិធីមង្គលការកូនប្រុសស្រី។

ជាមួយនឹងការរៀបពិធីនេះ គេឃើញថា រោងបានសង់លើផ្លូវជាតិលេខ៥៦ស្ថិតក្នុងភូមិសុភីសង្កាត់កំពុងស្វាយ​ក្រុងសិរីសោភ័ណ​មាន​សមត្ថកិច្ចជា​ច្រើននាក់បានយាមកាមយ៉ាងតឹងរ៉ឹងក្នុងនោះក៏បានបិទផ្លូវជាតិនេះទាំងស្រុងផងដែរ រាល់យានជំនិះត្រូវបាន​គេបង្វៀង​ឲ្យទៅចរាចរណ៍ផ្លូវផ្សេងវិញ។

ប្រជាពលរដ្ឋបានធ្វើការរិះគន់ចំៗថា នៅក្នុងខេត្តបន្ទាយមានជ័យទាំងអ្នកមានអំណាច និងអ្នកមានលុយឲ្យតែមានកម្មវិធីម្តងៗ គឺមានទម្លាប់​តែងតែបង្កការ​ក្តៅក្រហាយដល់អ្នកធ្វើដំណើរក៏ព្រោះតែសង់រោងរំលោភដីផ្លូវ និងបានជួល​ឲ្យ​សមត្ថកិច្ច​នគរបាល​ដាក់ប៉ារ៉ាស់បិទផ្លូវព្រោះតែចង់ល្បី និងបង្ហាញពីភាពសម្បូរ និងភាពខ្លាំងរបស់ខ្លួន។

ពួកគាត់បានសំណូមពរមកPost Newsសូមឲ្យអ្នកមានអំណាចនិងអ្នកមានលុយអាងខ្នងអាងខ្សែឲ្យបញ្ឈប់ទម្លាប់បិទផ្លូវរបៀបនេះទៀត។

គាត់ថា នេះសំរាប់អ្នកមានលុយមានខ្សែមានអំណាចសង់មិនទើសក្បាលអាណា គឺរលូនរហូតដល់កម្មវិធីចប់សព្វគ្រប់តែបើចំពោះ​អ្នកក្រីក្រគ្មានខ្សែគ្មានកន្លុះមួយម៉ោងមិនទាន់ទេ គឺរលាយហើយ៕