ស្ទឹងត្រែងៈ រថយន្តកាមរីគូថស្វិតមួយគ្រឿងបានបុកជាមួយរថយន្តយីឌុប​ដឹកដំឡូងលាន់ដូចរន្ទះ បណ្ដាលមនុស្សម្នាក់ស្លាប់ និង២នាក់ទៀត រងរបួសធ្ងន់ស្រាល។

គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៨យប់ថ្ងៃទី១៤ ខែមករា ឆ្នាំ២០១៧ ត្រង់ចំណុចភូមិច្រប់ ស្រុកសេសាន ខេត្តស្ទឹងត្រែង។

បើតាមសម្តីបងប្រុសនារីរងគ្រោះបាននិយាយថា ប្អូនស្រី និងគាត់ ព្រមទាំងម្តាយក្មេកប្អូនស្រី បានបើក​រថយន្តកាមរីគូថស្វិត ពណ៌ទឹកប៊ិច ពាក់ស្លាកលេខ គ4987ភព២ ជារថយន្តរបស់លោក ឈិន ម៉ៅ អ្នកសារព័ត៌មានប្រចាំខេត្តរតនគីរី ធ្វើដំណើរ​ចេញពីខេត្តរតនគីរីឆ្ពោះទៅខេត្តក្រចេះ ដើម្បីចូលរួមពិធីមង្គលការបងប្អូន។

ប្រភពដដែលបានបន្តថា លុះធ្វើដំណើរ​មកដល់ចំណុចខាងលើស្ថិតក្នុងទឹកដីខេត្តស្ទឹងត្រែង ស្រាប់តែមានរថយន្តយីឌុបដឹកដំឡូង ពាក់ស្លាកលេខ កំពង់ចាម 3A-4064 បើកឡើងឆ្លងកាត់ទទឹងផ្លូវ បណ្តាលឲ្យ​វាក់អឺគ្នា ជាមួយនឹងរថយន្តរបស់ប្អូនស្រីគាត់ ជាន់ហ្វ្រាំងមិនជាប់ ក៍ជ្រុលទៅបុកចំកង់ទ្រុងចំហៀង បណ្តាលឲ្យ​រថយន្តប្អូនស្រីគាត់ខ្ទេចផ្នែកខាងមុខយ៉ាងដំណំ។ ចំណែកម្តាយក្មេកបានបោកក្បាលទៅនឹងតាបឡូរថយន្តបាក់កស្លាប់ភ្លាមៗតែម្តង។ ក្រោយកើតហេតុ​ភ្លាមតៃកុងរថយន្តយីឌុបបានបើកទ្វាររត់ចោលរថយន្តភ្លាមៗផងដែរ។

ស្ត្រីរងគ្រោះដែលស្លាប់មានឈ្មោះ អៀម ស្រៀន អាយុ៨០ឆ្នាំ រស់នៅ ភូមិកន្ទួត ស្រុកចិត្របូរី ខេត្តក្រចេះ។ ចំណែកនារីរងគ្រោះឈ្មោះ ខន សុខម៉ាណែត អាយុ២២ឆ្នាំ រស់នៅភូមិអូរកន្សែង ឃុំបឹងកន្សែង ខេត្តរតនគីរី(រងរបួសគ្រាំក្នុង) និងម្នាក់ទៀតរងរបួសស្រាល។

បច្ចុប្បន្នសពស្ត្រីរងគ្រោះ ត្រូវបានកូនបង្កើតដឹកយកទៅធ្វើបុណ្យតាមប្រពៃណីនៅខេត្តក្រចេះ។ ចំណែកនារីរងគ្រោះ ដែលត្រូវជាកូនប្រសារកំពុងសង្គ្រោះមន្ទីពេទ្យបង្អែកខេត្តស្ទឹងត្រែង។

ដោយឡែករថយន្តទាំង២គ្រឿងត្រូវបានសមត្ថកិច្ចអូសយកមករក្សារទុកក្នុងស្នងការដ្ឋាននគរបាលខេត្តស្ទឹងត្រែង រង់ដោះស្រាយពេលក្រោយ៕