ភ្នំពេញ: ហាងកាហ្វេមួយកន្លែងមានឈ្មោះថា តេស្ត កាហ្វេបានរងនូវការខូចខាតបន្ទប់ស្ទីមសូណា១ និងសម្ភារ:មួយចំនួន។
ហេតុការណ៍អគ្គិភ័យឆាបឆេះហាងកាហ្វេនេះ បានកើតឡើងកាលពីវេលាម៉ោង៩និង១០នាទីព្រឹកថ្ងៃទី២៦ ខែមករា ឆ្នាំ២០១៧ ស្ថិតនៅភូមិចោមចៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
លោក ព្រហ្ម យ៉ត នាយការិយាល័យពន្លត់អគ្គិភ័យរាជធានីភ្នំពេញបានបញ្ជាក់ថា ម្ចាស់ផ្ទះឈ្មោះ ចាន់ យាដារ៉ន ភេទប្រុស អាយុ៤៥ឆ្នាំ មុខរបរជាមន្រ្តីនគរបាល ហើយមូលហេតុនោះ បណ្តាលមកពីឆ្លងចរន្តភ្លើង។
ប្រភពពីបុគ្គលិកដែលបំរើការនៅហាងខាងលើបានឲ្យដឹងថា នៅមុនពេលកើតហេតុពួកនៅជាន់ទីមួយបានឃើញផ្សែងភ្លើងហុយចេញពីម៉ាស៊ីនស្ទីមងងឹតធ្លុបឃើញដូច្នេះក៏នាំគ្នារត់ចុះមកក្រោមខ្លះចុះសំរូតតាមខ្សែពួរចុះទើបរួចខ្លួន ព្រោះខ្លាចជាប់ក្នុងបន្ទប់ចេញមិនរួច។
សមត្ថកិច្ចមូលដ្ឋានបានបញ្ជាក់ថា សម្ភារ:ដែលខូចខាតរួមមានបន្ទប់ស្ទីមសូណា ម៉ាស៊ីនសម្រាប់ស្ទីមសូណា ម៉ាស៊ីនកម្ដៅ និងសម្ភារ:ប្រើប្រាស់ក្នុងហាងមួយចំនួនធំ និងគិតជាទឹកប្រាក់អស់ប្រហែលជាង៣ម៉ឺនដុល្លារ។
សមត្ថកិច្ចបានបន្តថា នៅមុនពេលកើតហេតុគាត់បានលឺសំលេងទុស្សេខ្សែភ្លើង ហើយក៏បានរត់ឡើងទៅមើល ក៏ស្រាប់តែឃើញមានផ្សែងហុយពេញបន្ទប់ស្ទីម។ សម្រាប់ប្រតិបត្តិការពន្លត់អគ្គិភ័យ ប្រើប្រាស់រថយន្តពន្លត់អគ្គិភ័យរបស់ស្នងការរាជធានីភ្នំពេញ៧គ្រឿងនិងអង្គភាព «ង៧០» ចំនួន៥គ្រឿង ទើបសមត្ថកិច្ចគ្រប់គ្រងអគ្គិភ័យបានទាំស្រុងនៅម៉ោង១០និង៤០នាទីព្រឹកថ្ងៃខែឆ្នាំដដែល៕
មតិយោបល់