ភ្នំពេញ: លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងប្រាប់ក្រុមអ្នកសារព័ត៌មាន
តាមបណ្ដាញទំនាក់ទំនង Telegram ថា ” ក្រោយពីបញ្ចប់សវនាការរឿងក្តីឃាតកម្មលើលោក កែម ឡី នាថ្ងៃនេះសាលាដំបូង នឹងប្រកាសសាលក្រមនៅថ្ងៃទី២៣ ខែមីនា ឆ្នាំ២០១៧ ពេលព្រឹក ” ។

ថ្លែងនៅក្នុងអង្គសវនាការនាព្រឹកថ្ងៃទី១ ខែមីនា ឆ្នាំ២០១៧នេះ ជនជាប់ចោទឈ្មោះ ជួប សំលាប់ បានអះអាងថា
ខ្លួនបានបាញ់សំលាប់លោកបណ្ឌិត កែម ឡី ពិតមែន ព្រោះខឹងមិនព្រមសងលុយ ៣០០០ដុល្លារ ។
ជនជាប់ចោទបញ្ជាក់ថាខ្លួនមានឈ្មោះ ជួប សំលាប់ តាំងពីកំណើត និងបច្ចុប្បន្នសាច់ញាតិបានស្លាប់អស់ហើយ។

ព្រោះតែភាពក្រីក្ររូបគេធ្លាប់បានចូលទៅរស់នៅបន្ទាយទាហានមួយ (មិនបញ្ជាក់ទីតាំង) ដើម្បីធ្វើជាអ្នកដាំបាយ យកបាយហូប និងនៅទីនោះហើយដែលខ្លួនបានរៀនបាញ់កាំភ្លើងបានយ៉ាងស្ទាត់ជំនាញ ។ ជនជាប់ចោទបាន បន្ដថា
រូបគេបានទៅប្រទេសថៃដើម្បីធ្វើកម្មករ និងធ្លាប់សុំអំពៅគេហូបជំនួសបាយទៀតផង ។

ជួប សំលាប់ ថាកាំភ្លើងដែលគេប្រើដើម្បីបាញ់សំលាប់លោកបណ្ឌិត កែម ឡី គឺរូបគេទិញពីប្រទេសថៃ តម្លៃ ៥ម៉ឺនបាត ។
ប៉ុន្តែនៅក្នុងសវនាការនាព្រឹកនេះ ជួប សំលាប់ ថារូបគេមិនបានចាំសម្លៀកបំពាក់ដែលលោកបណ្ឌិត កែម ឡី
ស្លៀកក្នុងថ្ងៃស្លាប់នោះទេ បើទោះបីជានៅមុនពេលបាញ់សំលាប់ជនរងគ្រោះ រូបគេបានដើរមើល និងកត់សម្គាល់
អត្តសញ្ញាណជនរងគ្រោះយ៉ាងច្បាស់ក៏ដោយ ។ ក្រោយពេលបាញ់សម្លាប់ជនរងគ្រោះ រូបគេបានរត់ចេញ
ហើយក៏មានជនមិនស្គាល់មុខដេញបាញ់រូបគេសម្លាប់ដែរ ប៉ុន្តែបាញ់មិនត្រូវ ។

សមាសភាពជំនុំជម្រះនៃសំណុំរឿងនេះរួមមាន: ១-លោក លាង សំណាត់ ជាប្រធានក្រុមប្រឹក្សាចៅក្រមជំនុំជម្រះ,២-លោក លី សុផាណា ជាតំណាងអយ្យការ និងទី៣-លោក សុខ សេង ជាក្រឡាបញ្ជី ។

ជនជាប់ចោទឈ្មោះ អឿត អាង ហៅ ជួប សំលាប់ ភេទប្រុស កើតថ្ងៃទី១០ ខែធ្នូ ឆ្នាំ១៩៧២ ត្រូវបានលោក លី សុផាណា
តំណាងអយ្យការចោទប្រកាន់ពីបទ ឃាតកម្មគិតទុកជាមុន និងបទកាន់កាប់អាវុធដោយគ្មានការអនុញ្ញាត យោងតាមមាត្រា ២០០ និងមាត្រា ៤៩០ នៃក្រមព្រហ្មទណ្ឌ ។

គួររំលឹកថា ជនជាប់ចោទឈ្មោះ អឿត អាង ហៅ ជួប សំលាប់ ភេទប្រុស អាយុ ៣៨ឆ្នាំ បានបាញ់សំលាប់ជនរងគ្រោះឈ្មោះ កែម ឡី ភេទប្រុស អាយុ៤៦ឆ្នាំ មុខរបរ ប្រធានអង្គការអភិវឌ្ឍសង្គម និងស្រាវជ្រាវបញ្ហាសង្គម មានទីលំនៅផ្ទះលេខ ០៨E0 ផ្លូវលេខ ៣៩២ សង្កាត់បឹងកេងកង១ ខណ្ឌចម្ការមន រាជធានីភ្នំពេញ នៅក្នុងស្តារម៉ាត របស់ស្ថានីយ៍ប្រេងឥន្ធន:កាល់តិច បូកគោ កាលពីវេលាម៉ោង៨ និង៥០នាទី ព្រឹកថ្ងៃទី១០ ខែកក្កដា ឆ្នាំ២០១៦ ។

ទោះជាយ៉ាងណាមកដល់ម៉ោង ១២ថ្ងៃត្រង់នេះ លោក លាង សំណាត់ ជាប្រធានក្រុមប្រឹក្សាចៅក្រមជំនុំជម្រះ
នៅមិនទាន់បិទបញ្ចប់សវនាការនៃសំណុំរឿងនេះនៅឡើយទេ ៕