សៀមរាប ៖ ភ្ញៀវទេសចរណ៍ដែលគ្រោងមកចូលរួមពិធីអង្គរសង្ក្រាន្តក្នុងថ្ងៃបុណ្យចូលឆ្នាំខ្មែរប្រពៃណីជាតិ នៅខេត្តសៀមរាប បានសម្ដែងការ ត្អូញត្អែរថា ម្ចាស់សណ្ឋាគារ និងផ្ទះសំណាក់នៅខេត្តទេសចរណ៍ មួយមានការឡើងថ្លៃស្រេច តែអំពើចិត្ត ហើយអាជ្ញាធរ និងមន្ទីរពាក់ព័ន្ធហាក់បីដូចមិនខ្វាយខ្វល់សោះឡើយ។
ភ្ញៀវទេសចរណ៍ម្នាក់ មកពីភ្នំពេញដែលសុំមិនបង្ហាញឈ្មោះ បានឲ្យដឹងថា ដោយសារតែក្រុមគ្រួសារនិងក្រុមការងារបានឈប់សំរាកពីការងារក្នុងថ្ងៃបុណ្យចូលឆ្នាំ ហើយមានបំណងចង់មកចូលរួមពិធីអង្គរសង្ក្រាន្ត នៅខេត្តទេសចរណ៍ សៀមរាបអង្គរ រូបគាត់ បានទាក់ទងកក់ បន្ទប់ផ្ទះសំណាក់ទុកជាមុន។
ភ្ញៀវដដែល បន្តថា ការទាក់ទងកក់ទុកនោះក៏ត្រូវម្ចាស់ផ្ទះប្រាប់ថាមុនថ្ងៃទី១៣ ខែមេសា បន្ទប់ម៉ាស៊ីនត្រជាក់គ្រែ២មួយ បន្ទប់តម្លៃ១៥ដុល្លារ(តម្លៃធម្មតា)ចំពោះគ្រែ១ម៉ាស៊ីនត្រជាក់១០ដុល្លារប៉ុន្តែចាប់ពីថ្ងៃទី១៣ ខែមេសាតទៅគឺឡើងថ្លៃដោយម៉ាស៊ីនត្រជាក់គ្រែ២តម្លៃ៣៥ដុល្លារ ឯគ្រែ១តម្លៃ២៥ដុល្លារ។
ប្រភពដដែល បន្ដែមថា ការឡើងថ្លៃបន្ទប់ផ្ទះសំណាក់នៅសៀមរាបនេះបានធ្វើឲ្យមានការខកខានដំណើរកម្សាន្តក្នុងពិធីអង្គរសង្ក្រាន្តរបស់ក្រុមការងារពួកគាត់ ដោយសារតែគ្មានលទ្ធភាពស្នាក់នៅ។ចំណែកក្រុមគ្រួសារគាត់វិញក៏ដូចគ្នាដែរ ដំបូងគ្រោងចូលរួមពិធីអង្គរសង្ក្រាន្ត តែដោយម្ចាស់ផ្ទះសំណាក់បញ្ជាក់ពីការឡើងថ្លៃគ្រួសារគាត់មើលពិធីអង្គរសង្ក្រាន្តបានត្រឹមមុនថ្ងៃសម្ដែង(ត្រឹមថ្ងៃទី១២មេសា)។
ដោយឡែកប្រភពមួយទៀត បញ្ជាក់ថា តាមពិតមន្ទីរជំនាញនិងអាជ្ញាធរខេត្តមួយនេះមិនគួរមើលរំលងបណ្តោយឲ្យថៅកែផ្ទះសំណាក់ជ្រើសយកថ្ងៃបុណ្យប្រពៃណីជាតិមកធ្វើអាជីវកម្មលើពលរដ្ឋខ្មែរហួសកម្រិតបែបនេះសោះ។
ជាមួយគ្នានេះដែរ នៅវេទការតុកាហ្វេ តូចមួយនៅខេត្តសៀមរាប ក៏បានលើកឡើងថា ក្រុមគ្រួសាររបស់គាត់ក៏បានទាក់ទងកក់បន្ទប់សណ្ឋាគារមួយនៅសៀមរាបផងដែរ ប៉ុន្តែវាប្រហែលគ្នាគឺចាប់ពីថ្ងៃទី១៣ ខែមេសា មួយបន្ទប់៣០ដុល្លារ ឡើងដល់៦០ដុល្លារ។ រឿងដេកមិនដេក កក់ឬមិនកក់ មិនខ្វល់ទេខ្លាចតែរកបន្ទប់ឲ្យភ្ញៀវមិនបានផង។ ប្រភពដដែល បន្ថែមបែបឆ្ងល់ថា ឬមួយក៏មានការឯកភាពពីអាជ្ញាធរខេត្តមួយនេះទើបអាចធ្វើបាន។
ប្រភពបន្ថែមថា តាមពិតអាជ្ញាធរនិងមន្ទីរពាក់ព័ន្ធគួរចេញសេចក្តីជូនដំណឹងជាមុន អំពីការយកថ្ងៃបុណ្យចូលឆ្នាំមកធ្វើអាជីវកម្មបែបគាបសង្កត់។ ប្រភព បន្ថែមទៀតថា ពុំមែនតែឆ្នាំនេះទេ នៅខេត្តសៀមរាប គឺរាល់ឆ្នាំតែម្តង។ក្នុងមួយឆ្នាំៗ គេនាំគ្នាកើបលុយម្តងគឺអញ្ចឹងហើយ នេះមិនហៅថាពុករលួយទេ។
ពុំមានរបាយការជាក់លាក់ថា ខេត្តសៀមរាបមានសណ្ឋាគារចំនួនប៉ុន្មានផ្ទះសំណាក់ចំនួនប៉ុន្មាន និងបន្ទប់ចំនួនប៉ុន្មាន ហើយតម្លៃចាប់ពីកម្រិតណាដល់កម្រិតណានោះទេ។ចំពោះការឡើងថ្លៃទ្វេគុណនៃបន្ទប់សណ្ឋាគារនិងផ្ទះសំណាក់ក៏មិនដឹងពីមូលហេតុដែរ។
ប្រធានមន្ទីរទេសចរណ៍ខេត្តសៀមរាបលោក ងូវ សេងកាក់ មិនទទួលទូរស័ព្ទ ដោយហៅចូលច្រើនដង។ ទាក់ទិននឹងករណីនេះដែរលោក សូ ប្លាតុង អភិបាលក្រុងសៀមរាបក៏មិនលើកទូរសព្ទ័ដើម្បីបញ្ជាក់ពីការឡើងថ្លៃបន្ទប់ស្នាក់នៅនេះដែរ។
ការលើកឡើងខាងលើនេះ គេមានការសង្ឃឹមយ៉ាងមុតមាំថា ខាងក្រសួងពាក់ព័ន្ធនៅភ្នំពេញប្រាកដជាអាចដោះស្រាយបញ្ហាដ៏រាំ រ៉ៃនេះឲ្យជ្រះស្រលះម្តងដើម្បីកុំឲ្យមហាជនរិះគន់តទៅទៀត៕
មតិយោបល់