ភ្នំពេញ: នៅរសៀលថ្ងៃទី២ ខែឧសភា ឆ្នាំ២០១៧ លោក គឹម រ័ត្នណារិន ប្រធានក្រុមប្រឹក្សាចៅក្រមជំនំជម្រះ សាលាដំបូងរាជធានីភ្នំពេញ បានប្រកាសសម្រេចផ្តន្ទាទោស ជនជាប់ចោទឈ្មោះ បូថា ចាកូប៊ូល (BOTHA JACOBUS DAWE) សាវី ភេទប្រុស អាយុ៣០ឆ្នាំ ដាក់ពន្ធនាគារ កំណត់រយ:ពេលអស់មួយជីវិត និងពិន័យជាប្រាក់ចំនួន៤០លានរៀល ចូលជាថវិការដ្ឋ ពីបទរក្សាទុកដឹកជញ្ជូន និងជួញដូរដោយខុសច្បាប់នូវសារធាតុញៀន ប្រភេទកាកូអ៊ីន ចំនួន៥៨៧,១០ ក្រាម ដែលមានកម្រិតធាតុសុទ្ធ ចំនួន ៨១,៥៧% ប្រព្រឹត្តនៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៣ ខែកញ្ញា ឆ្នាំ២០១៦ យោងតាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន។

នៅក្នុងសវនាការនាព្រឹកថ្ងៃទី១០ ខែមេសា ឆ្នាំ២០១៧ កន្លងទៅ ជនជាប់ចោទបានសារភាពថា ខ្លួនបានស្គាល់ស្ត្រីម្នាក់ឈ្មោះ យូកូ ជា ជនជាតិប្រេស៊ីល នៅប្រទេសអាហ្វ្រិចខាងត្បូង។ ជនជាប់ចោទបន្ដថា ស្ត្រីឈ្មោះ យូកូ បានយកគ្រឿងញៀន ប្រភេទកាកូនអ៊ីន ច្រកជាគ្រាប់ ចំនួន៤២គ្រាប់ មកឲ្យខ្លួនលេបចូលក្នុងពោះ និងបានរៀបចំឯកសារឆ្លងដែនមកកម្ពុជា ដើម្បីយកគ្រឿងញៀនទៅឲ្យបុរសជនជាតិ នីហ្ស៊េរីយ៉ា ម្នាក់ដែលចាំទទួលនៅ ផ្ទះសំណាក់ មានលាភថ្មី នៅម្តុំខណ្ឌមានជ័យ។ ប៉ុន្តែមិនទាន់បានទៅដល់ផ្ទះសំណាក់ផង ក៏ត្រូវសមត្ថកិច្ចឃាត់ខ្លួននៅអាកាសយានដ្ឋានអន្តរជាតិភ្នំពេញតែម្តង។

លោកវរ:សេនីយ៍ទោ ឈុំ សុភាព បានអនុការិយាល័យ ក៣ នៃមន្ទីរប្រឆាំងគ្រឿងញៀន អគ្គស្នងការនគរបាលជាតិបានឲ្យសវនាការដឹងថា ដោយមានការផ្តល់ព័ត៌មានពីប្រទេសថៃ ទើបសមត្ថកិច្ចការិយាល័យរបស់លោកបាន ចាប់ខ្លួនជនជាប់ចោទបាន នឹងដកហូតបានគ្រឿងញៀនប្រភេទ កាកូអ៊ីនចំនួន ៤២គ្រាប់ក្រោយពីជនជាប់ចោទបាន ជុះអស់៕