ព័ត៌មានជាតិ

Update៖ ឈ្លោះជាមួយប្តីជនជាតិចិនបែរជាទិញសាំងមកដុតបន្ទប់ជួលបណ្តាលឲ្យឆេះខ្លួនទាំងប្តីនិងប្រពន្ធ

ភ្នំពេញ: អគ្គិភ័យមួយបានឆាបឆេះយ៉ាងសន្ធោសន្ធៅក្នុងបន្ទប់ជួលជាន់ទី៤មួយកន្លែង ដោយសារតែស្រ្តីជនជាតិខ្មែរម្នាក់ មិនដឹងជាមានទំនាស់អ្វីជាមួយនិងបុរសជនជាតិចិនជាប្តីម្នាក់និងទំនងជាងបែកថ្នាំញៀនផងនោះ ក៏បានទិញសាំងជាច្រើនដបយកមកដុតបណ្តាលឲ្យឆេះរងរបួសយ៉ាងធ្ងន់ធ្ងរទាំង២នាក់ និងបង្កឲ្យមានការភ្ញាក់ផ្អើល ដល់បងប្អូនប្រជាពរដ្ឋ រួមនឹងរថយន្តពន្លត់អគ្គិភ័យជាច្រើនគ្រឿងចុះទៅធ្វើអន្តរាគមន៍ទាំងកណ្តាលថ្ងៃត្រង់។

ហេតុការណ៍នេះដែរបានកើតឡើងកាលពីវេលាម៉ោង ១២ និង ២០នាទីថ្ងៃត្រង់ ថ្ងៃទី ២០ ខែមិថុនា ឆ្នាំ២០១៧ នៅចំណុចបន្ទប់ជួលគ្មានលេខជាន់ទី៤ ផ្ទះលេខ ៣៧ ផ្លូវលេខ៣០០ ក្នុងសង្កាត់បឹងកេងកងទី២ ខណ្ឌចម្ការមន រាជធានីភ្នំពេញ។

តាមប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះទាំង២នាក់ មានឈ្មោះ ឡូ រ៉ែន អាយុ៥១ឆ្នាំ ជាជនជាតិចិន មានមុខរបរបុគ្គលិកក្រុមហ៊ុន(ត្រូវជាប្តី) និងស្ត្រីជាប្រពន្ធដែលរងរបួសធ្ងន់ដូចគ្នានោះ មិនទាន់ស្គាល់អត្តសញ្ញាណនោះទេ គ្រាន់តែដឹងថាជនជាតិខ្មែរពេលនេះកំពុងតែសម្រាកព្យាបាលនៅមន្ទីរពេទ្យ។

មុនពេលកើតហេតុ គេបានឃើញស្ត្រីជនជាតិខ្មែរខាងលើ ទំនងជាបែកថ្នាំ បានយួរដបសាំងជាច្រើនដបដាក់ក្នុងថង់ ហើយក៏បានឡើងទៅលើបន្ទប់ផ្ទះជួលរបស់ខ្លួន ដោយបុរសជាប្តីជនជាតិចិននៅក្នុងនោះ បានមួយសន្ទុះក្រោយមកក៏ស្រាប់តែបានឃើញភ្លើងឆាបឆេះយ៉ាងខ្លាំង និងមានសំឡេងស្រែកទើបបង្កឲ្យមានការភ្ញាក់ផ្អើលកើតឡើងតែម្តង។

ភ្លាមៗនោះក៏មានការភ្ញាក់ផ្អើលទៅដល់ប្រជាពលរដ្ឋ និងកម្លាំងមានសមត្ថកិច្ចនគរបាលមូលដ្ឋានបានអន្តរាគមន៍ហៅរថយន្តពន្លត់អគ្គិភ័យជាច្រើនគ្រឿងទៅធ្វើអន្តរាគមន៍បាញ់ពន្លត់ និងជួយសង្គ្រោះជនរងគ្រោះទាំង២នាក់ប្តីប្រពន្ធ ដែលត្រូវបានភ្លើងឆាបឆេះរលាកពេញខ្លួនរងរបួសយ៉ាងធ្ងន់ធ្ងរផងដែរ។

ពាក់ព័ន្ធទៅនឹងការឆេះបន្ទប់ជួលខាងលើនេះដែរ គឺបង្ករឡើងដោយស្ត្រីជាប្រពន្ធ មានទំនាស់ជាមួយនិងប្តីជាជនចាតិចិនខាងលើ ដោយមិនមានអ្នកណាម្នាក់បានដឹងថា ពួកគេមានទំនាស់អ្វីនឹងគ្នានោះឡើយ ទើបឈានទៅការដុតបន្ទប់ខ្លួនឯង បែបនេះ។

ក្នុងករណីនេះដែរ កម្លាំងមានសមត្ថកិច្ចក៏បានហៅរថយន្តសាមុយមកដឹកយកជនរងគ្រោះទាំង២នាក់ប្តីប្រពន្ធយកទៅសង្គ្រោះ និងហៅរថយន្តពន្លត់អគ្គិភ័យចំនួន ៤គ្រឿងចុះមកធ្វើអន្តរាគមន៍ និងប្រើប្រាស់ទឹកអស់ចំនួន ២គ្រឿងទើបភ្លើងរលត់ទៅបាន និងឆេះបំផ្លាញអស់សម្ភារ:ប្រើប្រើប្រាស់ក្នុងផ្ទះមួយចំនួនទៀតផង៕

មតិយោបល់