(កំពង់ចាម)៖ ប្រជាពលរដ្ឋដែលរស់នៅតាមដងផ្លូវជាតិលេខ៧១ ពីស្រុកចម្ការលើទៅក្រុងកំពង់ចាម តែងតែបានឃើញសកម្មភាព ដឹកជញ្ជូនឈើ យ៉ាងអានាធិបតេយ្យ ចេញពីទឹកដីខេត្តកំពង់ធំ ឆ្លងកាត់ស្រុកចម្ការលើ ដើម្បីដើរចែកចាយតាមបណ្ដាស្រុកនានា ទូទាំងខេត្តកំពង់ចាម ជារៀងរាល់ថ្ងៃដោយរថយន្តសាំយ៉ុង ពី១០ទៅ២០គ្រឿងក្នុង១ថៃ្ង ។
ប្រភពព័ត៌មាន បានឲ្យដឹងថា រថយន្តទាំងនោះមួយចំនួនបានដឹកចេញពីដេប៉ូលក់ឈើ យីហោ ណាំ ចាន់ណា ដែលមានទីតាំងនៅដីថ្មី ស្ថិតក្នុងភូមិស្រែប្រាំង ឃុំតាប្រុក ស្រុកចម្ការលើ ខេត្តកំពង់ចាម ក្នុងនោះមួយចំនួនទៀតគឺដឹកជញ្ជូនពុំមានច្បាប់អនុញ្ញាតត្រឹមត្រូវឡើយ ។
ប្រជាពលរដ្ឋ បានលើកឡើងថា ចាប់តាំងពីប្រមុខរដ្ឋាភិបាលបានដាក់បទបញ្ជា ដោយបានចាត់តាំង ឯកឧត្តម នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ជាប្រធានគណ:កម្មការទប់ស្កាត់ បង្ក្រាបបទល្មើសព្រៃឈើ ឃើញថា សកម្មភាពដឹកជញ្ជូនឈើតាមរថយន្តធំៗ មានសភាពស្ងប់ស្ងាត់ ប៉ុន្តែបានប្ដូររូបភាពមកដឹកតាមរថយន្តសាំយ៉ុង និងរ៉ឺម៉កម៉ូតូយ៉ាងគគ្រឹកគគ្រេងកាត់មុខប៉ូលិសចរាចរណ៍ ជារៀងរាល់ថ្ងៃទាំងនៅខេត្តត្បូងឃ្មុំ និងខេត្តកំពង់ចាម ដោយមិនឃើញមានសមត្ថកិច្ចជំនាញត្រួតពិនិត្យឡើយ ៕
មតិយោបល់