ភ្នំពេញ: ហេតុការណ៍ភ្ញាក់ផ្អើលមួយបានកើតឡើង បន្ទាប់ពីបុរសជាកូនមកពីផឹកស៊ីស្រវឹង ហើយត្រូវបានឪពុកស្ដីប្រដៅបន្តិចបន្តួច បុរសជាកូនស្រែកឡូឡារ ឪពុកទ្រាំមិនបានក៏យកដុំឈើគប់ ហើយជនសង្ស័យជាកូនបានទាញយកកៅអីនិងដំដងឈើវាយតបទៅលើឪពុកវិញ ចំក្បាលបែក និងវាយម្ដាយរបួសពកក្បាល។

ហេតុការណ៍បានកើតឡើងនៅវេលាម៉ោង២រសៀល ថ្ងៃទី១២ ខែកក្កដា ឆ្នាំ២០១៧ នៅក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។

សមត្ថកិច្ចបានឲ្យដឹងថា ជនរងគ្រោះជាឪពុកឈ្មោះ ឡ សៀម អាយុ៦៥ឆ្នាំ និងម្ដាយឈ្មោះ ភូ គឹមអៀ អាយុ៦០ឆ្នាំ ស្នាក់នៅភូមិឃុំកើតហេតុខាងលើ មានស្រុកកំណើតនៅក្នុងភូមិត្រពាំងក្ដារ ឃុំស្រែជាខាងត្បូង ស្រុកដងទុង ខេត្តកំពត។

ជនសង្ស័យជាកូនឈ្មោះ ឡ ហាប់ អាយុ៣០ឆ្នាំ មុខរបរ អ្នកបើកបររថយន្តឲ្យជនជាតិចិន ហើយបានឈប់ទៅវិញ មកពីគិតតែផឹកស្រវឹង និងសង្ស័យញៀនថ្នាំ។

តាមប្រភពព័ត៌ពីកន្លែងកើតហេតុ បានឲ្យដឹងថា មុនពេលកើតហេតុ គេឃើញជនសង្ស័យជាកូនផឹកស៊ីស្រវឹង ក៏ត្រូវបានឪពុកស្ដីប្រដៅបន្តិចបន្តួច ហើយខឹងក៏ស្រែកឡូឡារ ឪពុកទ្រាំមិនបានទាញយកដុំឈើគប់ ហើយភ្លាមនោះជនសង្ស័យជាកូនទាញយកកៅអីនិងដំបងឈើវាយទៅលើឪពុក ចំក្បាល បែក ចំណែកស្រ្តីជាម្ដាយបានចូលទៅឃាត់ ក៏ត្រូវជនសង្ស័យជាកូន វាយ របួសពកក្បាល។ ភ្លាមៗនោះកម្លាំងនគរបាលប៉ុស្ដិ៍ចោមចៅបានចុះទៅដល់កន្លែងកើតហេតុ ឃាត់ខ្លួនជនសង្ស័យខាងលើបានតែម្តង៕