ភ្នំពេញៈ មានករណីគ្រោះថ្នាក់ចររាចរណ៍មួយបានកើតឡើង ដោយសារតែរថយន្តមួយគ្រឿងបានបើកបរលឿនដូចហោះ ហើយបែកកង់មុខផ្នែកខាងឆ្វេងក៏រ៉េពេញផ្លូវ បណ្តាលឲ្យហោះឡើងសួនច្បារចែកទ្រូងផ្លូវឆ្លងទៅម្ខាងទៀតទៅបុកម៉ូតូមួយគ្រឿងយ៉ាងពេញទំហឹងបណ្តាលឲ្យស្ត្រីម្នាក់រងរបួសធ្ងន់ធ្ងរ។

ហេតុការណ៍គ្រោះថ្នាក់ចររាចរណ៍នេះបានកើតឡើងកាលពីវេលាម៉ោង១១និង២០នាទីព្រឹក ថ្ងៃទី២០ ខែកក្កដា ឆ្នាំ២០១៧ នៅតាមបណ្តោយផ្លូវជាតិលេខ៦ ត្រង់ចំណុចមុខហាងនំប៉័ងផ្កាយមាស ក្រុម៦ ភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។

រថយន្តបង្កម៉ាកVIGO ពណ៌ទឹកប្រាក់ ពាក់ស្លាកលេខភ្នំពេញ2I-0199 អ្នកបើកបរមិនត្រូវបានគេស្គាល់ឈ្មោះនោះទេ។ រឺឯម៉ូតូរងគ្រោះម៉ាក ហុងដាឌ្រីមសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ភ្នំពេញ1FH-5971 អ្នកបើកបរមិនត្រូវបានគេស្គាល់នោះទេ ដោយគ្រាន់តែដឹងថារងរបួសធ្ងន់ធ្ងរ ហើយត្រូវបានដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត្រ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញរថយន្តបង្ក បានបើកបរតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើងក្នុងល្បឿនលឿនដូចហោះ ខណៈមកដល់ចំណុចកើតហេតុខាងលើ ស្រាប់តែរថយន្តបានបែកកង់មុខផ្នែកខាងឆ្វេង ហើយក៏រ៉េចង្កូតហោះឡើងសួនច្បារបុកដើមជ្រៃក្រឹមនៅលើសួនច្បារ បណ្តាលឲ្យដួលទ្រេតមួយដើម ហើយក៏ជ្រុលចង្កូតទៅមុខចូលទៅចំណែកផ្លូវម្ខាងទៀត ក៏បុកម៉ូតូមួយគ្រឿងទៀត របស់ស្ត្រីម្នាក់ដែលកំពុងជិះយ៉ាងពេញទំហឹងបណ្តាលឲ្យរងរបួសធ្ងន់ធ្ងរ ហើយត្រូវសមត្ថកិច្ចហៅរថយន្តសង្គ្រោះបន្ទាន់ ដឹកយកទៅមន្ទីរពេទ្យកាល់ម៉ែត្រ ដើម្បីជួយសង្គ្រោះបន្ទាន់។

ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយបានទាក់ទងទៅសមត្ថកិច្ចជំនាញចុះមកវាស់វែង នាំយកមធ្យោបាយពាក់ព័ន្ធ និងអ្នកបើកបររថយន្តបង្កទៅកាន់ការិយាល័យចររាចរណ៍ជើងគោក នៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយតាមក្រោយ៕