ភ្នំពេញៈ បុរសជនជាតិម្នាក់ ខណៈកំពុងដើរតាមផ្លូវតែម្នាក់ឯង ក៏មានជនសង្ស័យមួយក្រុមមានគ្នាប្រមាណ៥នាក់ មកធ្វើសកម្មភាពព្រួតវាយបំណងយកទ្រព្យសម្បត្តិ តែត្រូវប្រជាពលរដ្ឋឃើញហេតុការណ៍សហការគ្នា ដេញជនសង្ស័យនិងឃាត់បានម្នាក់វាយសល់ដង្ហើមចង្រិត រីឯជនរងគ្រោះរបួសធ្ងន់ បានទៅសង្គ្រោះនៅគ្លីនិកឯនជនភ្លាមៗ។

ហេតុការណ៍នេះកើតឡើងនៅវេលាម៉ោង១២ និង១០នាទីយប់ រំលងអធ្រាតឈានចូលថ្ងៃទី ១៤ សីហា ២០១៧ នៅលើផ្លូវបេតុងអង្គតាមិញ ភូមិគោកចំបក់ សង្កាត់ចោមចៅ២ ខណ្ឌពោធិ៍សែនជ័យ ។

ខណៈដែលជនសង្ស័យម្នាក់និងជនរងគ្រោះស្ថិតក្នុងស្ថានភាពធ្ងន់ធ្ងរ ដោយមិនទាន់រៀបរាប់ពីសាច់រឿងនិងអត្តសញ្ញាណ បាននៅឡើយទេ។

តាមសាក្សីពីកន្លែងកើតហេតុ បានឲ្យដឹងថា មុនពេលកើតហេតុគេឃើញជនរងគ្រោះជនជាតិចិន ដើរតែម្នាក់ឯងតាមផ្លូវបេតុងអង្គតាមិញ ដោយក្នុងដៃមានកាន់ម្ហូបនិងស្រាបៀរ លុះខណៈដើរមកដល់ចំណុចផ្លូវកោងក្រោយបន្ទាយកងភេរវកម្ម ក៏ស្រាប់តែមានជនសង្ស័យប្រមាណ៥ តាមមកវាយក្នុងបំណងយកទ្រព្យសម្បត្តិពីជនរងគ្រោះ តែមិនទាន់បានផង ជនរងគ្រោះបានស្រែកឆោឡោរឡើង បង្កឲ្យមានការភ្ញាក់ផ្អើល ដល់ប្រជាពលរដ្ឋនៅទីនោះនាំគ្នាមកជួយជនរងគ្រោះ ទើបធ្វើឲ្យជនសង្ស័យរត់ខ្លះ ឃាត់បានម្នាក់នៅកន្លែងកើតហេតុ រួចបានសំពង ឡើងទ្រោមខ្លួនសល់ដង្ហើមចង្រិត ក្រោយជនរងគ្រោះត្រូវបានគេដឹកទៅសង្គ្រោះនៅគ្លីនិកឯនជន ចំណែកជនសង្ស័យដេករងរបួសធ្ងន់នៅនិងកន្លែង។

ក្រោយកើតហេតុ សមត្ថកិច្ចមូលដ្ធានបានចុះទៅពិនិត្យនិងនាំជនសង្ស័យទៅមន្ទីរពេទ្យដោយមានការ ការពារយ៉ាងតឹងរឹងនៅមន្ទីរពេទ្យ រួចបានសួរនាំប្រភពនៅកន្លែង ធ្វើឯកសារនិងទៅទទួលពាក្យបណ្តឹងជនរងគ្រោះដល់គ្លីនិកដោយមានអ្នកបកប្រែ ដើម្បីងាយស្រួលកំណត់មុខសញ្ញាដែលរត់គេចខ្លួន ព្រមទាំងចម្លើយរបស់ជនសង្ស័យនៅពេលក្រោយ៕