ភ្នំពេញៈ ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានប្រជាពលរដ្ឋបានប្រទះឃើញជនសង្ស័យម្នាក់ បានធ្វើសម្មភាពចាប់បង្ខាំងនារីម្នាក់នៅក្នុងបន្ទប់ជួលអស់រយៈពេលជាច្រើនម៉ោង បណ្តាលឲ្យថប់ខ្យល់ដង្ហើម សន្លប់បាត់ស្មារតី ផ្អើលដល់សមត្ថកិច្ចជំនាញអធិការដ្ឋាននគរបាលពោធិ៍សែនជ័យ សហការជាមួយនគរបាលប៉ុស្តិ៍ចោមចៅ ចុះមកអន្តរាគមន៍ជួយសង្គ្រោះនារីរងគ្រោះបានទាន់ពេលវេលា។ ប៉ុន្តែខណៈដែលកំពុងជួយសង្គ្រោះនោះ ស្រាប់តែសមត្ថកិច្ចប្រទះឃើញជនសង្ស័យ៣នាក់ ដែលគ្រាន់តែឃើញសមត្ថកិច្ចភ្លាមបានប្រញាប់រត់គេចខ្លួន ជាហេតុធ្វើឲ្យសមត្ថកិច្ចសង្ស័យក៏ដេញឃាត់ខ្លួនបានចំនួន៣នាក់ ឆែកឆេរស្រាប់តែឃើញដាវស៊ាំម៉ូរ៉ៃ១ដើមជាប់នឹងខ្លួនទៅវិញ។

ហេតុការណ៍នេះបានកើតឡើងកាលពីវេលាម៉ោង ១០ និង៣០នាទីយប់ ថ្ងៃទី២៨ ខែសីហា ឆ្នាំ២០១៧ ស្ថិតនៅចំណុចបន្ទប់ជួលជាន់ទី២ ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

គួរបញ្ជាក់ផងដែរថា បើយោងតាមប្រភពព័ត៌មានពីប្អូនស្រីជនរងគ្រោះបានឲ្យដឹងថា មុនពេលកើតហេតុ ខ្លួនជាប្អូនបាននាំសង្សារ និងមិត្តភក្តិប្រុស របស់សង្សារខ្លួនម្នាក់ទៀតមកដេកនៅបន្ទប់ជួលរបស់បងស្រីខ្លួន ព្រោះតែផ្ទះជួលដែលខ្លួនជាប្អូនស្នាក់នៅត្រូវម្ចាស់ចាក់សោ ។ ក្រោយមក ក៏មានបុរសម្នាក់ដែលជាជនសង្ស័យ បានទូរសព្ទមករកខ្លួននិងបានសួររកលេខទូរសព្ទរបស់បុរសម្នាក់ ប៉ុន្តែដោយសារនាងជាប្អូនមិនឲ្យ ជនសង្ស័យក៏បាននិយាយគំរាមថា «បើមិនឲ្យថ្ងៃហ្នឹង ប្រាកដជាមានម្នាក់ត្រូវស្លាប់!» ក្រោយមកក៏ស្រាប់តែលឺដំណឹងថា បងស្រីរបស់ខ្លួនត្រូវជនមិនស្គាល់មុខ ចាប់បង្ខាំងនៅក្នុងបន្ទប់ជួលតែម្តង។

ភ្លាមៗប្រជាពលរដ្ឋនៅនឹងកន្លែងកើតហេតុ បានរាយការណ៍ជូនសមត្ថកិច្ចថាមានករណីចាប់មនុស្សបង្ខាំងទុកនៅក្នុងបន្ទប់ជួល ទើបភ្លាមៗ​កម្លាំងនគរបាលជំនាញខណ្ឌពោធិ៍សែនជ័យ បានសហការជាមួយនគរបាលប៉ុស្តិ៍ចោមចៅ ចុះមកអន្តរាគមន៍រំដោះនារីរងគ្រោះខាងលើនេះបាន ប៉ុន្តែដោយសារតែបន្ទប់ជួលខាងលើហប់ខ្យល់ខ្លាំងពេក ក៏បណ្តាលឲ្យនារីរងគ្រោះរងគ្រោះសន្លប់បាត់ស្មារតី ត្រូវបានគេបញ្ជូនតាមម៉ូតូដឹកយកទៅកាន់មន្ទីរពេទ្យ។ ដោយឡែកជនសង្ស័យវិញ ក្រោយពីធ្វើសកម្មភាពហើយភ្លាមក៏រត់គេចខ្លួនបាត់ស្រមោលតែម្តង។

គួរបញ្ជាក់បន្ថែមថា ខណៈដែលសមត្ថកិច្ចកំពុងតែជួយសង្គ្រោះនារីរងគ្រោះនោះ ស្រាប់តែប្រទះឃើញជនសង្ស័យ៣នាក់ ដែលគ្រាន់តែឃើញសមត្ថកិច្ចក៏ប្រញាប់រត់គេចខ្លួន ជាហេតុធ្វើឲ្យសមត្ថកិច្ចសង្ស័យដេញតាមចាប់ខ្លួនបានមកធ្វើការឆែកឆេរ ក៏រកឃើញដាវស៊ាំម៉ូរ៉ៃ១ដើម នៅជាប់នឹងខ្លួនរបស់ជនសង្ស័យម្នាក់ ក្នុងចំណោមបក្ខពួកទាំង៣នាក់​បន្ថែមទៀត៕

https://youtu.be/siD1OP5Z3Uw