កំពត: ជនសង្ស័យម្នាក់ ធ្វើសកម្មភាពលួចម៉ូតូជនជាតិបារាំងដែលទុកនៅក្បែររបងផ្ទះជួលក្នុងខេត្តកែបបានសម្រេច រួចយកមកជិះនៅក្នុងខេត្តកំពត ត្រូវសមត្ថកិច្ចល្បាតប្រទះឃើញធ្វើការចាប់ខ្លួនុ។

ការឃាត់ខ្លួននេះធ្វើឡើងកាលពីវេលាម៉ោង៥ល្ងាច ថ្ងៃទី២ ខែតុលា ឆ្នាំ២០១៧ ស្ថិតនៅចំណុច បណ្តោយផ្លូវជាតិលេខ៣ ផ្សារទ្វារថ្មី ស្ថិតក្នុងភូមិទ្វារថ្មី ឃុំព្រៃថ្នង ស្រុកទឹកឈូ ខេត្តកំពត។

ជនសង្ស័យដែលឃាត់ខ្លួនបានខាងលើនេះ មានឈ្មោះ តូន ណែត ភេទប្រុស អាយុ១៨ឆ្នាំ រស់នៅភូមិស្រែជាខាងត្បូង ឃុំស្រែជា ស្រុកដងទង់ ដកហូតបានម៉ូតូម៉ាកអាយខនចំនួន ១ គ្រឿង។

តាមការសារភាពបានបញ្ជាក់ថា ខ្លួនលួចម៉ូតូជនជាតិបារាំងដែលទុកនៅក្បែររបងផ្ទះជួល ក្នុងខេត្តកែប ពិតប្រាកដមែន ហើយបច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់តុលាការចាត់ការតាមនីតិវិធីច្បាប់បន្តទៀត៕