ភ្នំពេញៈ យោងតាមប្រភពពីសមត្ថកិច្ចខណ្ឌសែនសុខ បានឲ្យដឹងថា នៅព្រឹកថ្ងៃទី៧ ខែតុលា ឆ្នាំ២០១៧នេះ លោក សាន សុផាត ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាសម្រេច បង្គាប់ឲ្យឃុំខ្លួន ជនសង្ស័យ ២នាក់ ដែលជា បុគ្គលិកសន្តិសុខក្រុមហ៊ុនបុរីពិភពថ្មី ពាក់ព័ន្ធ រឿង ឃាតកម្មលើស្ត្រីពាណិជ្ជករម្នាក់ប្លន់យកទ្រព្យសម្បត្តិ។

ប្រភពបន្ដថា លោក ហ៊ឹង ប៊ុនថន ជាតំណាងអយ្យការកាន់សំណុំរឿង បានសម្រេចចោទប្រកាន់លើឈ្មោះ ប្រាក់ រ៉ាន្នី ភេទប្រុស អាយុ ៣៦ឆ្នាំ មុខរបរ សន្តិសុខ បុរីពិភពថ្មី និងទឈ្មោះ កឿន សុធា ភេទប្រុស អាយុ ២០ឆ្នាំ មុខរបរ សន្តិសុខ បុរីពិភពថ្មី ពីបទ ប៉ុនប៉ង ឃាតកម្ម លើជនរងគ្រោះឈ្មោះ គឹម សុផុនវឌ្ឍនា ភេទស្រីអាយុ៣៦ឆ្នាំ មុខរបរ ជាពាណិជ្ជករ ប្រព្រឹត្តកាលពីព្រឹកថ្ងៃទី០១ ខែតុលា ឆ្នាំ ២០១៧ នៅចំណុចក្នុងផ្ទះលេខ៣១ ក្រុម១២ ផ្លូវលេខ៦បេតេ ភូមិគោកឃ្លាង សង្កាត់គោកឃ្លាង ខណ្ឌសែនសុខ យោងតាមមាត្រា ២៧ និងមាត្រា ១៩៩ នៃក្រមព្រហ្មទណ្ឌ។

គួររំលឹកថា កាលពីព្រឹកថ្ងៃទី០១ ខែតុលា ឆ្នាំ ២០១៧កន្លងទៅ មានករណីជនរងគ្រោះម្នាក់ឈ្មោះ គឹម សុផុនវឌ្ឍនា ភេទស្រីអាយុ៣៦ឆ្នាំ
មុខរបរ ជាពាណិជ្ជករ ត្រូវបានជនសង្ស័យ អារ.ក របួសធ្ងន់ នៅចំណុចក្នុងផ្ទះលេខ៣១ ក្រុម១២ ផ្លូវលេខ៦បេតេ ភូមិគោកឃ្លាង សង្កាត់គោកឃ្លាង ខណ្ឌសែនសុខ។

ក្រោយការស្រាវជ្រាវ សមត្ថកិច្ចខណ្ឌសែនសុខ នៅថ្ងៃដដែល បានឃាត់ខ្លួនជនសង្ស័យចំនួន ៦នាក់ ដែលជាក្រុមហ៊ុន បុរីពិភពថ្មី ប៉ុន្តែក្រោយមក ជនសង្ស័យ ៤នាក់ដែលមិនមានការពាក់ព័ន្ធ ក៏ត្រូវសមត្ថកិច្ចដោះលែងឲ្យមានសេរីភាពវិញ។

យោងតាមសមត្ថកិច្ច នៅកន្លែងកើតហេតុសមត្ថកិច្ចនគរបាលជំនាញព្រហ្មទណ្ឌ បាន
ចុះធ្វើកោសល្យវិច័យ រកឃើញសម្ភារៈបន្សល់ទុក នៅកន្លែងកើតហេតុរួមមាន៖
-ពិលពាក់ក្បាលសន្តិសុខពិភពថ្មីចំនួន ១
-ខ្សែក្រវ៉ាត់របស់សន្តិសុខបុរីពិភពថ្មីចំនួន ១
-មួកសន្តិសុខបុរីពិភពថ្មី ប្រលាក់ឈាម ចំនួន ១
-ស្បែកជើង ផ្ទាត់មួយចំហៀង

សមត្ថកិច្ចបន្ថែមថា ជនសង្ស័យទាំង២នាក់ខាងលើ ក៏ត្រូវបានរកឃើញមានផ្ទុកសារធាតុញៀនផងដែរ ហើយត្រូវបាន សមត្ថកិច្ចសាកសួរ និងកសាងសំណុំរឿងបញ្ជូនទៅតុលាការតែម្តង៕

https://youtu.be/P56qqAKF6O0